Messi mbretëron edhe jashtë fushës, dominon listën e fanellave më të shitura në MLS

Lionel Messi vazhdon të dëshmojë se ndikimi i tij në futbollin amerikan shkon shumë përtej paraqitjeve në fushën e lojës. Kapiteni i Inter Miamit mbetet figura më e kërkuar edhe në aspektin komercial, duke kryesuar sërish renditjen e fanellave më të shitura në Major League Soccer (MLS).

Lajmi është konfirmuar nga vetë liga amerikane, e cila bëri të ditur se ylli argjentinas ka përfunduar përsëri në vendin e parë, duke regjistruar kështu sezonin e katërt radhazi si futbollisti me fanellën më të shitur në mesin e 30 klubeve të MLS-së.

Edhe pse nuk janë publikuar shifrat e sakta të shitjeve, MLS ka zbuluar dhjetë futbollistët që kanë gjeneruar më së shumti të ardhura nga shitja e fanellave zyrtare.

Pas Messit, në këtë renditje pozicionohet sulmuesi koreano-jugor i LAFC-së, Son Heung-min, ndërsa podiumi plotësohet nga Thomas Muller i Vancouver Whitecaps.

Në pozitën e katërt gjendet Robert Lewandowski, i cili tashmë është pjesë e Chicago Fire, ndërsa vendi i pestë i takon Antoine Griezmannit, përforcimit të ri të Orlando Cityt.

Lista e dhjetë futbollistëve me fanellat më të shitura vazhdon me talentin amerikan Cavan Sullivan në vendin e gjashtë, Denis Bouanga në të shtatin, Luis Suarezin në të tetin, Hany Mukhtarin në të nëntin dhe Rodrigo de Paulin në pozitën e dhjetë.

Një tjetër detaj interesant është prania e tre futbollistëve të Inter Miamit në këtë listë, përkatësisht Lionel Messi, Luis Suarez dhe Rodrigo de Paul, duke dëshmuar edhe një herë fuqinë komerciale të klubit nga Florida.

Në këtë mënyrë, Messi vazhdon të jetë emri më i madh i MLS-së, jo vetëm për atë që ofron në fushë, por edhe për interesimin e jashtëzakonshëm që gjeneron te tifozët dhe tregu i futbollit amerikan.