Përgatiti: Arton Hamiti
Kjo është mënyra e vetme që kjo 5-vjeçare i ngroh duart. Me aq mundësi sa ka, babai i saj sigurohet që vajza edhe këmbët t’i ketë të ngrohta.
Ky cep i një garazhi nëntokësor në Prishtinë, për familjen treanëtarëshe Bunjaku nga Komuna e Obiliqit, tash e një muaj është strehë e vetme.
Në këto ditë të ftohta, vogëlushja 5-vjeçare e ka vetëm një dëshirë.
“Po veç me shku në një vend të nxehtë se këtu e kam shumë ftohtë”, thotë vogëlushja 5-vjeçare.
Meqë, familja Bunjaku qe një kohë jeton në kushte të vështira, vajza ishte sëmurë disa herë.
“Çika m’u ka sëmu disa herë, dorën krejt zi e ka prej injeksioneve, e kam çu te mjeku, i kanë thanë që është e ftoftë. Beso, na kemi flejt në fushë. Mbi neve shi na flejshim në tokë”, tha nëna e 5-vjeçares, Egzona Zeqiri.
Garazhi në lagjen “Kalabria” nuk ishte i vetmi vend, i improvizuar për familjen treanëtarëshe.
Bunjaku pretendon se ka mbetur rrugëve pas një problemi familjar.
Për rastin e kësaj familjeje janë të informuar edhe në Komunën e Obiliqit.
“Çfarë kemi kuptuar deri më tani është se familja jetonte në ndërtesat kolektive në Plemetin. Familjes Bunjaku iu nda një banesë dhe në kohën kur mori banesën ishte familje me 7 anëtarë e që atëherë ishin të mitur. Por para disa ditësh kuptuam që një pjesë e familjes u largua e kryefamiljari mbeti në banesë. Ne biseduam me prindërit e djalit dhe, sipas tyre, ai vetë deshi të largohej meqë ka krijuar familjen e vet”, tha shefi i Zyrës për Komunitete dhe Kthim në Komunën e Obiliqit, Slavisa Adzancic.
Sidoqoftë, Komuna është e hapur për t’iu ofruar ndihmë.
“Si komunë ne përpiqemi t’iu ndihmojmë sidomos qytetarëve nga komunitetet por kushtet janë të këtilla. Sidoqoftë atyre iu bëj thirrje që të vijnë të kërkojnë ndihmë për të parë, nëse mund t’ju ndihmojmë duke ua gjetur një vend për strehim”, tha Adzancic.
Në Kosovë nuk ka të dhëna të sakta lidhur me varfërinë ekstreme. Por, sipas të dhënave të papërditësuara kohëve të fundit nga Agjencia e Statistikave dhe Banka Botërore mbi 10 për qind e popullsisë jeton në varfëri.
