Përgatiti: Donisa Fazliu
Një pjesë e kulmit të shkollës fillore “Dëshmorët e fshatit Bubavec” në Bubavec të Malishevës, përfundoi në tokë, në dhjetor, shkaku i erërave të forta.
Që nga ajo kohë e deri të martën askush nga Komuna e Malishevës nuk intervenoi në rregullimin e këtij objekti.
Si rrjedhojë, gjatë gjithë kësaj kohe shiu ka depërtuar brenda objektit të shkollës.
“Tash që është prishë kulmi, shiu po hyn në klasë, nganjëherë mësimin e mbajmë në ndonjë klasë tjetër, e shpeshherë na thonë me shku në shtëpi, po kemi shumë ftoftë kur po është shi dhe ftohtë”, thotë një nxënës.
Banorët e këtij fshati akuzojnë drejtorin e shkollës për neglizhencë.
“Fajin kryesor këtu e ka drejtori i shkollës që e neglizhon punën e vet dhe nuk interesohet për vendin e punës së tij dhe për shkollën që është përgjegjës, ma shumë qëndron në kafe sesa në shkollë, kemi kërkuar nga ai që të bëjë kërkesë në komunë për rregullimin e këtij problemi, sepse sa qëndron kështu, do të dëmtohet gjithë objekti”, tha Qerim Kryeziu, banor i fshatit.
Selim Kryeziu, drejtori i kësaj shkolle, pavarësisht insistimit të televizionit, nuk pranoi të deklarohet.
Përveç kulmit, nxënësit e kësaj shkolle përballen edhe me mungesë të ndriçimit.
“Ka disa vite që nuk ka ndriçim në shkollë, janë prishë dritat dhe mësuesit janë të obliguar që nxënësit t’i përcjellin me drita të telefonit me i qitë jashtë shkollës që mos mu rrëzu shkallëve”, tha Kryeziu.
Ndërkaq, drejtoresha e Arsimit në Komunën e Malishevës, Arbëreshë Krasniqi, thotë se punimet për sanimin e dëmeve në këtë shkollë kanë nisur pikërisht të martën pasdite.
“Për shkak të procedurave të prokurimit na është pamundësuar dhe me thënë të drejtën jemi vonuar deri në këtë fazë, ndërkaq kemi pranuar edhe ne disa ankesa për shkak të ndriçimit në shkollë dhe besoj që shumë shpejt edhe kjo çështje do të rregullohet”, tha Krasniqi.
Në shkollën fillore “Dëshmorët e fshatit Bubavec”, ndjekin mësimet afër 300 nxënës.
