Komuna e Prishtinës, përmes Drejtorisë për Siguri dhe Emergjenca, ka njoftuar qytetarët se sot, më 22 gusht 2026, do të realizohet testimi i Sistemit të Alarmit Publik në kryeqytet.
Në bazë të njoftimit të publikuar në faqen zyrtare të Komunës, testimi do të zhvillohet në ora 12:15, dhe alarmi do të lëshohet me zë të njëtrajtshëm dy herë, secila duke zgjatur për 30 sekonda.
Komuna ka theksuar se bëhet fjalë vetëm për një testim teknik, pa asnjë lidhje me ndonjë situatë emergjente reale.
Për këtë arsye, qytetarëve u është bërë thirrje të mos shqetësohen nga aktivizimi i sirenave dhe të mos ndërmarrin veprime të panevojshme, siç është largimi i papritur nga vendet e punës apo shkollave.
“Ju lutemi të mos shqetësoheni, pasi bëhet fjalë vetëm për një testim teknik të sistemit”, thuhet në njoftimin e Drejtorisë për Siguri dhe Emergjenca.
