Gazetari i njohur italian Fabrizio Romano ka publikuar në Facebook lajmin e madh për tifozët e Arsenalit: Bukayo Saka është shumë pranë nënshkrimit të kontratës së re me klubin londinez, një marrëveshje që do ta mbajë yllin anglez në “Emirates Stadium” deri në qershor 2030.
Sipas Romanos, bisedimet kanë hyrë në fazën përfundimtare, me detajet e fundit të marrëveshjes që tashmë po finalizohen. Klubi dhe lojtari kanë pasur që prej muajsh negociata të vazhdueshme, dhe tashmë është arritur dakordësi për pikat kryesore të kontratës së re.
Rinovimi i Saka-s konsiderohet si një prioritet absolut për Arsenalin, pasi lojtari 23-vjeçar është kthyer në një nga figurat kryesore të projektit të Mikel Artetës. Me forma të shkëlqyera në Premier League dhe në arenën evropiane, Saka shihet si shtylla kryesore e të ardhmes së klubit.
Ky lajm ka sjellë reagime të shumta nga tifozët, të cilët e kanë pritur me entuziazëm sigurinë se një nga yjet më të mëdhenj të ekipit do të vazhdojë të jetë pjesë e Arsenalit për shumë vite të ardhshme.
