Historiani Durim Abdullahu, në emisionin CONTEXT në ATV, tha se ndonëse flitet shumë për luftën në Kosovë, në aspektin shkencor nuk ka një datë të saktë që konsiderohet si fillimi i saj.
Sipas tij, data 28 shkurt 1998, që zakonisht përmendet si fillim, është e imponuar nga institucionet ndërkombëtare, por lufta kishte nisur më herët.
“Zakonisht janë imponu data të cilat janë marrë prej institucioneve ndërkombëtare të drejtësisë, konkretisht sidomos prej Tribunalit Ndërkombëtar Penal për ish-Jugosllavinë që merr njëzet e tetë shkurtin, për shkak se është data kur ka ndodhë dhe masakra në Likoshan dhe në Qirez, por që kjo nuk do të thotë që është fillimi i luftës,” deklaroi Abdullahu.
Ai tha se bazuar në hulumtimet e tij, lufta në Kosovë nisi në fund të nëntorit të vitit 1997, me disa përplasje të armatosura në Drenicë.
“Unë kam vendosur qysh në titullin e librit që kam shkruar për luftën në Kosovë datat 1997–1999 dhe jo 1998–1999, sepse në gjykimin tim lufta në Kosovë ka fillu diku në fund të nëntorit të nëntëdhjetë e shtatës. Është njëzet e pesë nëntori kur një patrullë e policisë serbe në fshatin Vojnik të Drenicës sulmon një lagje, tre vëllezër dhe disa kushërinj i përgjigjen dhe nisin luftimet,” tha Abdullahu.
Deklaratën e plotë të Durim Abdullahut në CONTEXT, e gjeni në videon më poshtë:
