Sekretari amerikan i Shtetit, Antony Blinken foli me ministrin izraelit të Mbrojtjes, Yoav Gallant të hënën dhe kërkoi veprime të mëtejshme për të rritur ndjeshëm ndihmën humanitare në Rripin e Gazës.
Kështu tha Departamenti i Shtetit përmes një deklarate.
“Sekretari i Shtetit rishikoi veprimet që Izraeli ka ndërmarrë deri më sot dhe kërkoi veprime të mëtejshme për të rritur dhe mbështetur ndjeshëm ndihmën humanitare, përfshirë ushqimin, ilaçet dhe furnizimet e tjera thelbësore, për civilët në të gjithë Gazën”.
Administrata e presidentit Biden po shton kritikat ndaj Izraelit për mungesë të veprimeve të mjaftueshme për të përmirësuar kushtet humanitare në Rripin e Gazës, ndërsa zyrtarët izraelitë i afrohen një afati 30-ditor për të përmbushur disa kërkesa të Uashingtonit ose të rrezikojnë kufizime të mundshme të ndihmës ushtarake.
Gjithashtu, administrata Biden po dënon dhunën e fundit kundër palestinezëve në Bregun Perëndimor nga kolonët ekstremistë hebrenj dhe po bën thirrje që përgjegjësit e këtyre veprimeve të sillen para drejtësisë.
