Presidenti i Ukrainës, Volodymyr Zelensky, ka thënë se Rusia po planifikon të inskenojë “provokime të rrezikshme” në termocentralin e Zaporizhias, derisa Moska ka hedhur akuza në drejtim të Kievit.
Zelensky në një bisedë telefonike, i tha homologut të tij francez, Emmanuel Macron, se forcat okupuese ruse janë duke përgatitur provokime të rrezikshme në termocentralin bërthamor.
Në anën tjetër, Rusia akuzoi Ukrainën se po planifikon ta sulmojë termocentralin, duke paralajmëruar se një sulm në termocentralin e Zaporizhias mund të ketë pasoja të rënda.
Zëdhënësi i Kremlinit, Dmitry Peskov, tha të mërkurën se “situata është mjaft e tensionuar pasi kërcënimi për sabotim nga regjimi i Kievit është mjaft i lartë dhe se një sabotim mund të ketë pasoja katastrofike”.
Peskov tha se Ukraina është e gatshme të bëjë gjithçka, por nuk dha asnjë dëshmi për t’i mbështetur këto pretendime. Që nga javët e para të pushtimit rus të Ukrainës, që filloi në shkurt të vitit të kaluar, termocentrali bërthamor është i okupuar nga forcat ruse.
Ndërkohë, si Kievi, ashtu edhe Moska, kanë raportuar për luftime të ashpra përgjatë rajonit lindor të Donetskut, teksa forcat ukrainase po synojnë të rikthejnë territoret, si pjesë e kundërofensivës. /atvlive.tv
Edicionin Qendror të lajmeve në ATV e gjeni në videon më poshtë:
