Përgatiti: Armand Hoti
Një pjesë e tetorit, pritet të jetë rraskapitëse për disa nga ushtarët e Forcës së Sigurisë së Kosovës.
Ata, nga data gjashtë deri më 15 tetor, do të marrin pjesë në ushtrimin “Cambrian Patroll”, të organizuar nga Ushtria Britanike, që do të mbahet në Uells.
“Ushtrimi aktualisht përbëhet nga tetë faza, secila prej 48 orësh, në 10 ditë. Çdo patrullë do të përshkojë afërsisht 60, duke mbajtur jo më shumë se 32 kg për person. Ushtrimi është projektuar që të jetë i mundimshëm dhe të gjithë pjesëmarrësit duhet të jenë të përgatitur, si mendërisht, ashtu edhe fizikisht, për sfidën e ardhshme”, thuhet në njoftimin nga “Cambrian Patroll”.
Ministria e Mbrojtjes, përmes një përgjigje me shkrim për ATV-në, tregoi për avantazhet që ushtrimi në fjalë do të sjellë për ushtarët e FSK-së.
“Në këtë garë, FSK-ja merr pjesë me një skuadër. Ushtarakët tanë do të përvetësojnë aftësitë e fituara nga ushtrimet dhe trajnimet që ndjekin brenda dhe jashtë FSK-së, do të sfidohen në punën ekipore dhe të përvetësojnë nga njohuritë dhe eksperiencat e shteteve të tjera pjesëmarrëse në garë”, thuhet në përgjigjen e Ministrisë së Mbrojtjes.
Kadri Kastrati, ish-gjenerali i ushtrisë kosovare, tregon për sfidat që i presin trupat e FSK-së, pjesëmarrëse në këtë ushtrim.
“Ata me pesha të rënduara në trup, do të ngjiten në lartësi deri në 1000 metra, do të ecin në zona të minuara, do të bëjnë tërheqjen e të plagosurve. Jam krenar me rezultatet që ushtarët tanë kanë korrur në këtë ushtrim apo garë, gjithmonë jemi kthyer me suksese”, tha ish-gjenerali i FSK-së, Kadri Kastrati.
Ndërsa, eksperti i sigurisë, Drizan Shala, thotë se pjesëmarrja pasqyron marrëdhëniet e forta mes Kosovës dhe Britanisë, në fushën e mbrojtjes, si dhe orientimin e Kosovës drejt NATO-s.
“Kjo dëshmon faktin që FSK-ja tanimë është në rrugën e saj drejt integrimit në familjen e madhe të NATO-s dhe trajnime të tilla vetëm sa e forcojnë aspektin kuadrovik, sepse vetëm kështu mund të arrihet standardi i kërkuar”, tha Drizan Shala, ekspert i sigurisë.
Ndërkohë, nga Ambasada e Mbretërisë së Bashkuar në Kosovë, njoftuan se ushtarët kosovarë janë në fazat e fundit përgatitore para se të nisen drejt Uellsit.
Trupat e FSK-së, për herë të parë në këtë ushtrim morën pjesë në vitin 2016, ku arritën të siguronin medaljen e artë.
