Senegali ka nisur një apel pranë Gjykatës së Arbitrazhit Sportiv, pas vendimit që iu hoqi titullin e Kupës së Kombeve të Afrikës, të cilin ata e fituan fillimisht në fushë kundër Marokut.
Lajmin e konfirmoi zyrtari i federatës, Moussa Mbaye, i cili bëri të ditur se Senegali po ndjek rrugën ligjore për të mbrojtur të drejtën e tyre: “Ky është një proces ligjor që do ta nisim të martën. Do të dëgjoni shumë spekulime dhe lajme të pasakta, por njerëzit duhet të presin komunikimet zyrtare nga Federata Senegaleze e Futbollit.”
Mbaye theksoi se federata nuk do të veprojë nën emocione, por me qetësi dhe mendje të kthjellët për të mbrojtur interesat e vendit: “Ne jemi të vendosur ta trajtojmë këtë çështje profesionalisht dhe të bëjmë gjithçka për ta rikthyer titullin që fituam në fushë.”
Për këtë proces, Senegali ka angazhuar një avokat sportiv me përvojë ndërkombëtare, duke synuar që të sfidojë vendimin dhe, nëse është e mundur, të rikthejë trofeun e fituar me meritë në AFCON 2025.
Ky zhvillim vjen pas një situate që ka shkaktuar debate të gjera në mediat ndërkombëtare, duke e bërë një nga skandalet më të mëdha të fundit në futbollin afrikan.
