Përgatiti: Armand Hoti
Bashkimi Evropian ka ftuar palën kosovare dhe atë serbe të takohen në kryeqytetin politik të Evropës, në njëvjetorin e marrëveshjes së Brukselit. Por, diskutimi këtë herë do të zhvillohet rreth vendimit të autoriteteve në Prishtinë që ndalon përdorimin e dinarit.
Të mërkurën, kryenegociatori i Kosovës, Besnik Bislimi, tha se ai nuk do të marrë pjesë në këtë takim. Por, nga zyra e tij nuk kanë treguar se kush do ta përfaqësojë Kosovën në Bruksel më 27 shkurt.
Për ATV-në, zëdhënësi i Bashkimit Evropian, Peter Stano, tha se përzgjedhja e përfaqësuesve është lënë në vullnetin e dy vendeve përkatëse.
“Zakonisht ne nuk i komentojmë korrespondencat me partnerët tanë, por ftesa nga i dërguari i posaçëm Lajçak nuk kishte specifikuar se kush duhet ta përfaqësojë Kosovën dhe kush Serbinë”, ka thënë Stano.
Stano komentoi edhe deklaratën e Bislimit se emisari Lajçak ka shkelur parimet.
“Ne shpresojmë se zoti Bislimi do t’i vlerësojë përpjekjet, në vend që, në mënyrë të pabazë, t’i akuzojë zyrtarët e BE-së. Një sjellje e tillë është e papranueshme”, ka thënë Stano.
Episodin e fundit në raport me Brukselin e komentojnë edhe njohësit. Derisa një palë thotë se çështja e dinarit i takon pjesës teknike të dialogut, pala tjetër thotë se për dinarin sqarime duhet dhënë Banka Qendrore.
Ftesa për me dialogu për dinarin duhet të shihet si kërkesë legjitime e një shteti që pretendon se qytetarët e atij po trajtohen keq prej Kosovës… Por nuk duhet të diskutohet në nivel teknik, jo në nivel politik”, tha gazetari Zekirja Shabani.
“Unë mendoj që kryenegociatori nuk duhet të shkojë dhe askush prej Qeverisë së Kosovës nuk duhet të shkojë, por nëse lehtësuesit evropianë, apo amerikanë kanë nevojë për informacione shtesë, atëherë janë njerëzit përgjegjës në Bankën Qendrore të Kosovës”, tha profesori Basri Muja,.
Rregullorja e Bankës Qendrore të Kosovës hyri në fuqi më 1 shkurt dhe parasheh euron si valutën e vetme për kryerjen e pagesave me para të gatshme.
