Vedat Muriqi është figura kryesore aktualisht te Mallorca brenda dhe jashtë fushës.
30-vjeçari që ka fituar edhe dashurinë e madhe nga tifozët e skuadrës së La Ligas së Spanjës, ka dhënë sinjale se dëshiron ta përfundojë këtë edicion në Spanjë.
Së fundmi është raportuar se Muriqi po kërkohet nga Fenerbahçe e drejtuar nga trajneri portugez, Jose Mourinho.
Mourinho synon zëvendësimin e sulmuesit Youssef En-Nesyri, i cili mund të transferohet tek Al-Nassr për 30 milionë euro.
Por, Muriqi dhe Fenerbahçe kanë konfirmuar për mediumin spanjoll “AS” të enjten, se nuk do të ketë negociata për sulmuesin shtatlartë të Kosovës, në afatin kalimtar të janarit.
“Në Turqi më njohin, më njohin edhe drejtorët e klubit dhe trajnerët se çfarë mund t’i sjellë ekipit. Për këtë unë them se ka diçka të çuditshme për transferimet në dimër e në verë, jo vetëm në Turqi por në përgjithësi. Mallorca është e afërt me secilën prej ofertave në lidhje me këtë çështje. Skuadra nuk dëshiron t’i dëgjojë ato, as të shkruara e as të dëgjuara. Kjo po ndodh edhe tani. Për këtë nuk e shoh të mundshme largimin deri në afatin kalimtar të verës. Jam i lumtur”, ka thënë Muriqi të enjten.
Muriqi ka kontribuuar me tri gola e dy asistime në 15 paraqitje me Mallorcan në edicionin aktual aktual.
Mallorca sonte nga ora 20:00 luan kundër Real Madridit në gjysmëfinale të Superkupës së Spanjës.
Ndeshja zhvillohet në stadiumin “King Abdullah Sports City” në Jeddah të Arabisë Saudite.
Fituesi i këtij ballafaqimi do të luajë në finale të Superkupës me Barcelonën, që të enjten fitoi ndaj Athletic Bilbaos, 2:0.
