Zbulohet shkaku paraprak i vdekjes së futbollistit Jesus de Miguel, autopsia nxjerr detaje të reja

Raporti paraprak i autopsisë për sulmuesin e Tenerifes, Jesus de Miguel, ka zbuluar se shkaku i vdekjes së tij dyshohet të jetë një traumë aksidentale në gjoks, e shkaktuar gjatë përplasjes me portierin e Andorrës, Jesus Owono.

Futbollisti 30-vjeçar, i cili ndërroi jetë të martën në mëngjes pas disa orësh në kujdes intensiv, do të përcillet sot (e enjte) për në banesën e fundit në Navahermosa, vendlindjen e prindërve të tij pranë Toledos.

Gjetjet paraprake janë përgatitur nga Instituti i Mjekësisë Ligjore dhe Shkencave Ligjore në Santa Cruz de Tenerife dhe i janë dorëzuar gjyqtares Eva Esther Juarez Fernandez, e cila është përgjegjëse për drejtimin e hetimeve, raportojnë mediat spanjolle.

Sipas raportit, vdekja e De Miguelit është në përputhje me një traumë aksidentale në gjoks, si pasojë e kontaktit fizik me portierin e Andorrës, Jesus Owono, gjatë ndeshjes së zhvilluar të hënën.

Megjithatë, përfundimet e autopsisë nuk janë ende përfundimtare. Autoritetet janë në pritje të rezultateve të analizave shtesë mjekësore dhe ekzaminimeve të tjera, përfshirë skanimin CT të realizuar në spitalin Nuestra Senora de la Candelaria, ku sulmuesi ndërroi jetë të martën rreth orës 08:00.

Ndërkohë, Departamenti i Vrasjeve i Policisë Kombëtare Spanjolle ka nisur hetimet për të sqaruar plotësisht rrethanat e kësaj tragjedie. Hetuesit po analizojnë jo vetëm përplasjen në fushë, por edhe ndërhyrjen dhe ndihmën mjekësore që futbollisti mori pas rrëzimit në stadiumin Heliodoro Rodriguez Lopez.

Sipas raportit të gjyqtares, portieri Owono kishte përdorur forcë të tepruar gjatë duelit, për çka ishte ndëshkuar me karton të kuq. Ndeshja mes Tenerifes dhe Andorrës u ndërpre përfundimisht në rezultatin 2-2.

Tashmë, hetimet dhe ekspertiza përfundimtare mjeko-ligjore pritet të hedhin më shumë dritë mbi ngjarjen tragjike dhe të përcaktojnë nëse ekziston përgjegjësi nga ndonjëra palë.

Detajet e plota të raportit po mbahen konfidenciale nga autoritetet, me qëllim respektimin e privatësisë së futbollistit dhe familjes së tij.