Milani hyn në garë për Jules Kounden, Chelsea dhe Bayerni gjithashtu në ndjekje të francezit

Milani ka shprehur interesim për mbrojtësin e Barcelonës, Jules Kounde, duke iu bashkuar Chelseat dhe Bayern Munichut në garën për shërbimet e reprezentuesit francez. Lajmi është raportuar nga mediumi spanjoll SPORT, duke iu referuar Calciomercatos.

Klubi italian synon të përforcojë repartin defensiv me një futbollist të kalibrit të lartë dhe Kounde shihet si një nga alternativat e mundshme për këtë objektiv. Mbrojtësi mund të bëhet pjesë e merkatos nëse Barcelona pranon një ofertë të konsiderueshme për kartonin e tij.

Interesimi për francezin nuk është i ri. Chelsea kishte tentuar ta transferonte atë edhe para se të kalonte te Barcelona, ndërsa Bayerni vazhdon ta monitorojë nga afër situatën e tij në klubin katalunas.

Një nga faktorët që mund ta bëjë Kounden objektiv të klubeve të mëdha është roli i tij aktual te Barcelona. Nën drejtimin e Hansi Flickut, francezi nuk e ka më të garantuar vendin në formacionin titullar, ndërsa Eric Garcia po preferohet së fundmi në krahun e djathtë të mbrojtjes. Megjithatë, minutat e Koundes janë shtuar pas pushimit të fundit për ndeshjet e kombëtareve.

Pavarësisht interesimit nga jashtë, Barcelona nuk ka ndërmend ta largojë menjëherë mbrojtësin, i cili ka kontratë të vlefshme deri në qershor të vitit 2030. Për më tepër, Kounde nuk ka shfaqur shenja se dëshiron të largohet nga gjiganti spanjoll.

Sipas raportimeve, nëse Barcelona do të detyrohej të siguronte të ardhura të konsiderueshme përmes shitjeve, largimi i Alejandro Baldes mund të shqyrtohej para atij të Koundes. Mbrojtësi i krahut të majtë ka humbur hapësirë në formacion, ndërsa Joao Cancelo dhe Xavi Espart përbëjnë alternativa të tjera për atë pozitë.

Një element që e bën Kounden veçanërisht të vlefshëm për Barcelonën është fleksibiliteti i tij taktik, pasi mund të luajë si mbrojtës i djathtë, ashtu edhe në qendër të repartit defensiv. Megjithatë, një ofertë e lartë financiare mund ta shtyjë drejtorin sportiv Deco të rishqyrtojë të ardhmen e francezit.

Deri më tani, asnjëra nga skuadrat e interesuara nuk ka paraqitur ofertë zyrtare për mbrojtësin. Ndërkohë, Kounde është aktualisht i lënduar dhe ende nuk është bërë e ditur se sa do të zgjasë periudha e rikuperimit të tij.