Kombëtarja e Kosovës ka intensifikuar përgatitjet para miqësores së 7 qershorit ndaj Andorrës, e cila do të zhvillohet në stadiumin “Fadil Vokrri” në Prishtinë.
Nën drejtimin e përzgjedhësit Franco Foda dhe stafit të tij, futbollistët dardanë kanë zhvilluar një tjetër seancë stërvitore intensive, me fokus në aspektin taktik, organizimin e lojës dhe përmirësimin e koordinimit mes reparteve.
Sipas njoftimit nga kampi i kombëtares, atmosfera brenda ekipit mbetet shumë pozitive, ndërsa lojtarët po tregojnë përkushtim dhe disiplinë të lartë në çdo seancë stërvitore. Entuziazmi në grup është i madh, me synimin për një paraqitje sa më të mirë para tifozëve në “Fadil Vokrri”.
Megjithatë, gjatë stërvitjes së sotme është shënuar edhe një moment shqetësues. Portieri Arijanet Muric ka ndier shqetësim në muskujt e kërdhokullës së djathtë, çka ka ngritur dyshime për gjendjen e tij fizike.
Stafi mjekësor i kombëtares pritet t’i nënshtrojë ekzaminimeve të nevojshme në orët në vijim, për të vlerësuar shkallën e dëmtimit dhe për të përcaktuar nëse portieri dardan do të jetë i gatshëm për ndeshjen ndaj Andorrës.
Kosova do ta shfrytëzojë këtë miqësore për të testuar formën e lojtarëve dhe për të vazhduar ndërtimin e skuadrës para sfidave të ardhshme zyrtare.
