Fisnik Asllani gjen golin e parë sezonal në Bundesligë, ia dedikon babait në ditëlindjen e tij

Fisnik Asllani ka përjetuar një mbrëmje të paharrueshme në elitën e futbollit gjerman. Sulmuesi i Kombëtares së Kosovës ka realizuar golin e tij të parë këtë sezon në Bundesligë, duke ndihmuar Hoffenheimin të marrë një fitore të rëndësishme 2-1 ndaj Schalke 04.

Futbollisti kosovar e gjeti rrugën drejt rrjetës që në minutën e 10-të, pas një momenti të pafat për portierin kundërshtar, Loris Karius. Asllani ushtroi presion të vazhdueshëm ndaj gardianit gjerman dhe, pas një ndërhyrjeje me këmbë, topi përfundoi mbi të dhe në portë.

Pas përfundimit të ndeshjes, 24-vjeçari pranoi se në realizimin e golit kishte edhe pak fat, por theksoi se gjithçka erdhi si rezultat i lëvizjes dhe presionit të tij ndaj portierit.

“Pati pak fat që topi përfundoi në rrjetë në atë mënyrë, kjo është e vërtetë. Por nuk ishte vetëm fat, sepse unë bëra atë vrapim. Vetëm në atë mënyrë mund të shënohej goli. Nëse nuk do ta bëja atë lëvizje, goli nuk do të realizohej”, deklaroi Asllani.

Kjo fitore kishte rëndësi të veçantë për Hoffenheimin, i cili po kalon një periudhë jashtëzakonisht të ngarkuar, me nëntë ndeshje të zhvilluara brenda vetëm 29 ditësh. Lodhja dhe mungesat në skuadër kanë ndikuar dukshëm në përgatitjen e ekipit, gjë të cilën e pranoi edhe sulmuesi kosovar.

Megjithatë, Asllani u shpreh se preferon një ritëm të tillë, pasi për të nuk ka kënaqësi më të madhe sesa të zbresë në fushë dhe të luajë ndeshje çdo pak ditë.

“Unë jam dikush që e pëlqen këtë. Preferoj të luaj, asgjë nuk është më e mirë sesa të kesh ndeshje çdo disa ditë. Më mirë kështu sesa të stërvitem”, u shpreh reprezentuesi i Kosovës.

Por, përtej rëndësisë sportive, ky gol kishte një domethënie shumë më të veçantë për Asllanin. Sulmuesi zbuloi se realizimi i tij i parë në Bundesligë për këtë sezon erdhi pikërisht në ditëlindjen e babait, duke e kthyer golin në një dhuratë të paharrueshme familjare.

“Golat gjithmonë më japin një ndjenjë të veçantë, është gjithmonë diçka shumë e bukur. Por sot është edhe ditëlindja e babait tim. Ky ishte praktikisht dhurata ime për të. Goli im i parë në Bundesligë këtë sezon, nuk mund të shkruaja një histori më të bukur se kjo”, përfundoi Asllani.

Kështu, për Fisnik Asllanin, mbrëmja ndaj Schalkes nuk solli vetëm golin e parë sezonal në kampionatin gjerman, por edhe një moment emocional që do ta kujtojë gjatë, pasi arriti ta festojë këtë sukses duke i bërë dhuratën më të bukur babait të tij në ditën e lindjes.