Ernest Muçi shkëlqen te Trabzonspori, shifrat e tij janë dyfish më të mira se te Beşiktaşi!

46 ndeshje, 17 gola dhe 15 asistime. Ernest Muçi po kalon një periudhë shumë të mirë te Trabzonspori, ku është shndërruar në një nga lojtarët më produktivë të skuadrës turke.

Fantazisti shqiptar duket se ka rigjetur formën e tij më të mirë, duke lënë gjurmë me paraqitjet dhe kontributin në repartin ofensiv. Statistikat e publikuara nga mediumi turk “Sabah Spor” tregojnë qartë dallimin në performancën e tij krahasuar me aventurën e mëparshme te Beşiktaşi.

Në fanellën e Trabzonsporit, Muçi ka zhvilluar 46 ndeshje, në të cilat ka realizuar 17 gola dhe ka dhënë 15 asistime. Në total, ai ka kontribuar drejtpërdrejt në 32 gola, duke dëshmuar rëndësinë e tij në lojën sulmuese të ekipit.

Ndërkohë, periudha e tij te Beşiktaşi kishte shifra më modeste. Në 61 paraqitje me skuadrën nga Stambolli, futbollisti shqiptar kishte shënuar 11 gola dhe kishte regjistruar katër asistime, për gjithsej 15 kontribute në gola.

Dallimi mes dy aventurave është i dukshëm. Te Trabzonspori, Muçi ka arritur më shumë se dyfishin e kontributeve në gola, ndonëse ka luajtur 15 ndeshje më pak.

Këto statistika dëshmojnë rritjen e produktivitetit të mesfushorit ofensiv shqiptar, i cili po shfrytëzon në mënyrën më të mirë mundësitë e tij dhe po luan një rol gjithnjë e më të rëndësishëm në skuadrën turke.