Partia Demokratike e Shqipërisë ka reaguar pas deklaratës së ministres së Administratës Publike dhe Vetëqeverisjes Lokale të Serbisë, Snezhana Paunoviq, ndaj Kosovës, duke thënë se ajo meriton të shpallet person “non grata” dhe të paditet për nxitje të gjenocidit.
Në reagimin zyrtar, PD-ja ka dënuar deklaratën e Paunoviqit, duke e cilësuar si raciste dhe antishqiptare, ndërsa ka thënë se ajo bie ndesh me parimet themelore të Deklaratës Universale të të Drejtave të Njeriut.
“Këto ditë, në media ka qarkulluar një deklaratë ultraraciste dhe antishqiptare e ministres serbe të Administratës Publike dhe Vetëqeverisjes Lokale, Snezhana Paunoviq, në qeverinë e padronit të Edi Ramës, Aleksander Vuçiçit.
Në këtë deklaratë, ajo shprehet: “Po të isha në vend të Sllobodan Millosheviçit në vitin 1998, do ta kisha spastruar etnikisht Kosovën.”
Me këtë deklaratë, kjo figurë e ultranacionalizmit serb shpreh keqardhje që xhelati i Ballkanit, Sllobodan Millosheviçi, me operacionin e tij “Patkoi” dhe me gjenocidin e fundit serb ndaj shqiptarëve, nuk arriti t’i dëbonte ata nga trojet e tyre mijëvjeçare”, thuhet në reagimin e Partisë Demokratike.
Më tej, PD-ja ka theksuar se dënon qëndrimet e tilla, si dhe ka kritikuar reagimin e kryeministrit shqiptar Edi Rama përballë deklaratave të tilla.
“Partia Demokratike e dënon me forcë deklaratën raciste dhe antishqiptare të kësaj përfaqësueseje të ultranacionalizmit primitiv serb, si edhe qëndrimin e Edi Ramës dhe të narkoqeverisë së tij përballë deklaratave të tilla çnjerëzore dhe nxitëse të urrejtjes, të cilat bien ndesh me parimet themelore të Deklaratës Universale të të Drejtave të Njeriut. Shpallja e saj non grata dhe paditja për nxitje të gjenocidit janë të vetmet qëndrime që ajo meriton”, thuhet në deklaratën zyrtare të Partisë Demokratike.
