Alban Dragusha pritet të marrë drejtimin e FC Prishtinës

FC Prishtina është në prag të një tjetër ndryshimi në pankinë, pasi Alban Dragusha pritet të emërohet trajneri i ri i skuadrës, duke u bërë kështu i treti që e drejton ekipin në sezonin 2025/2026.

Ky zhvillim vjen pas dorëheqjes së Afrim Tovërlanit, të cilën klubi e konfirmoi pas humbjes së fundit ndaj Ferizajt me rezultat të thellë 3-0. Disfata ka zbehur ndjeshëm shpresat e prishtinasve për titullin kampion këtë edicion.

Tovërlani mori drejtimin e skuadrës më 25 nëntor dhe gjatë periudhës së tij udhëhoqi ekipin në 15 ndeshje në të gjitha garat, duke regjistruar 4 fitore, 3 barazime dhe 8 humbje.

Ndërkohë, Dragusha vjen pas një periudhe të suksesshme te Ramiz Sadiku, nga ku është larguar me marrëveshje të dyanshme. Marrëveshja me Prishtinën tashmë është arritur dhe zyrtarizimi i tij pritet të bëhet gjatë ditës së mërkurë.

Si ish-futbollist, Dragusha ka një karrierë të pasur, duke qenë pjesë e shumë klubeve vendore dhe ndërkombëtare, përfshirë KEK-un, Kosovën e Prishtinës, Vorskla Poltava, FK Baku, Besa Kavajë, Trepçën, Skënderbeun e Korçës, Kalmarin, Vushtrrinë, Hajvalinë, Dritën dhe Vëllaznimin.