Përgatiti: Benita Zeneli
Në ambientet e Kolegjit AAB këtë të premte u mbajt konferenca shkencore e Fakultetit të Komunikimit Masiv, e titulluar “Informimi, media dhe e vërteta në epokën e pas së vërtetës dhe inteligjencës artificiale.”
Dy studiuesit më të njohur në botë në fushën e komunikimit dhe medias ishin pjesë e kësaj konference.
Mark Deuze, profesor në universitetin e Amsterdamit, i njohur si ndër personazhet më eminente shkencore, para studentëve foli për gjetjet e tij të fundit shkencore, të përfshira në librin “Jeta në media: Një hyrje globale në studimet e medias”.
“Gjatë kësaj konference duhet përqendruar se çfarë mundemi ne si gazetarë, studiues të fushës e profesorë të kontribuojmë në çështjet me të cilat po përballet bota e prezantohen në media, sikurse ndryshimet klimatike apo krizat me refugjatë, apo tregjet globale… luftërat, sepse të gjitha këto kanë elemente mediale e ne kemi përgjegjësi që të trajtojmë këto çështje”, tha Deuze.
Ndërsa, Lukasz Tomczyk, i ranguar në mesin e shkencëtarëve më me ndikim, njëkohësisht profesor në një nga universitetet e Polonisë, trajtoi temën për “Krijimin e informacionit të rremë në internet për mësuesit dhe sigurinë digjitale të ekosistemit të shkollës”.
“Një mësues është fyer vazhdimisht në një forum të caktuar online. Komentet negative erdhën si nga nxënësit ashtu edhe nga prindërit e tyre. Çështja u raportua në polici dhe postimet denigruese u hoqën, por megjithatë ka shumë raste negative që iu kanë ndodhur mësimdhënësve. Nuk është aspak e lehtë për mësuesit, një gjë e tillë nuk është aspak e duhur”, tha Tomczyk.
Në konferencë, gjithashtu, morën pjesë edhe profesionistë të fushës së gazetarisë, marrëdhënieve me publikun, shkencave politike, marketingut e të tjerë.
