Përgatiti: Pranvera Krasniqi
Mbi 7 mijë e 600 intervista kanë përfunduar sa i përket procesit të regjistrimit të popullsisë nga 5 prilli e deri të hënën.
Këtë shifër e tregoi në konference për media, kryesheshefi ekzekutiv i Agjencisë së Statistikave të Kosovës, Avni Kastrati.
Sipas tij, java e parë e regjistrimit, deri tash është duke shkuar sipas planit.
“Kemi angazhuar regjistruesit, mbikëqyrësit dhe procesi është duke shkuar sipas planifikimit që kemi bërë herët. Aktualisht i kemi 98 për qind të mbikëqyrësve që kemi paraparë, 90 për qind e regjistruesve janë aktiv”, tha Kastrati.
Por, sfidë për ASK-në mbetet regjistrimi i komunitetit serb në veri të vendit, pasi disa regjistrues janë tërhequr nga ky proces. Kastrati thotë se janë duke punuar në zëvendësimin e tyre.
“Aktualisht kemi disa sfida nga komuniteti serb në disa pjesë, jo në gjithë Kosovës, dje ishim në pjesën veriore me disa kolegë, supozohet që ditëve në vijim do të angazhohen edhe ata…”, tha Kastrati.
Profesori universitar Mazllum Baraliu, thotë se secili individ ose komunitet që nuk merr pjesë në regjistrimin e popullsisë, do ta dëmtojë komunën ku banon.
Regjistrimi i Popullsisë, Ekonomive Familjare dhe Banesave në Kosovë ka filluar nga data 5 prill dhe do të zgjasë deri më 17 maj 2024.
