Përgatiti: Driton Sadiku
Ministria e Infrastrukturës ka përzgjedhur kompanitë fituese për rregullimin e rrugës Prishtinë – Pejë, konkretisht segmenti Kijevë – Dollc.
Sipas njoftimit për dhënie të kontratës, kostoja e punimeve kap shifrën e 32 milionë eurove.
Megjithatë, në njoftimin për kontratë mungon lloti i parë, ndërsa i dyti që kap vlerën e 6.2 milionë eurove, dhe u është dhënë një konsorciumi të kryesuar nga kompania “Empreus” Sh.P.K.
5.4 milionë llogaritet vlera për llotin e tretë në të cilin do të punojnë një grup operatorëve, në krye të së cilës është kompania “Lika Trade”.
Ndërkaq, lloti 4 me vlerën më të madhe prej 9.3 milionë eurove do të udhëhiqet nga kompania “Famis Co-HC”, bashkë me disa nënkompani.
Ndërkaq, pjesa tjetër nga Dollci në Zahaq, sipas zv.ministrit të infrastrukturës, së shpejti do të hyjë në fazën e tenderimit.
“E kemi ndarë buxhetin që të vazhdojmë nga Dollci deri në Zahaq dhe do të fillojmë procedurat e tenderimit për ndërtimin e komplet rrugës, ky do të thotë është zgjerim i rrugës me katër korsi komplet rruga N9 Prishtinë – Pejë me të njëjtat parametra, në mënyrë që ta përfundojmë komplet këtë segment të rëndësishëm të rrugës Prishtinë – Pejë”, tha zv.ministri i Infrastrukturës, Hysen Durmishi.
Rregullimi i rrugës po mirëpritet edhe nga banorët e asaj zone, meqë thonë se do ta lirojë qarkullimin.
“Do të jetë një fatbardhësi e madhe sepse do të lehtësohet komunikacioni, sepse në këtë aks rrugor ka pasur edhe shumë aksidente me fatalitet”, thotë një qytetar.
E gjithë rruga që lidh Prishtinën deri në Pejë, sipas Ministrisë së Infrastrukturës, do të kushtojë rreth 90 milionë euro.
Më shumë detaje i gjeni në Edicionin Qendror të lajmeve në videon më poshtë:
