LEXDOKS, e cila është një platformë e fuqizuar nga inteligjenca artificiale që përfshinë një bazë të të dhënave gjithëpërfshirëse dhe elektronikisht të kërkueshme të më shumë një milionë faqeve të burimeve juridike.
Kjo platforma ka marrë vlerësime nga institucione të ndryshme juridike.
Bashkëthemeluesi i kësaj platforme, Alban Krasniqi, në emisionin e mëngjesit ALARM në ATV, tha se duke pasur parasysh se në Kosovë, por edhe në vendet e rajonit, një platformë e tillë nuk kishte ekzistuar, ai së bashku me një grup prej 5 vetash kishin vendosur që ta zhvillojnë platformën e mençur LEXDOKS.
“Platforma LEXDOKS është si një lloj “Google” për ligjet dhe vendimet gjyqësore dhe gjithçka që është ligjore në Kosovë. Parimisht iu ndihmon gjyqtarëve, prokurorëve, avokatëve, praktikuesve të tjerrë të sistemit të drejtësisë, por po ashtu edhe studiuesve të sistemit të drejtësisë siç janë profesorët universitar, studentët, etj. Unë jam me fat që kame qenë në një rreth shoqëror që kanë qenë nga fusha diverse, duke përfshirë, programimin dhe tjera dhe jemi një grup prej pesë vetave që jemi bashkëthemelues të platformës dhe në 2017-2018, kemi filluar punën sepse e kemi vërejtur mungesën e një platforme të tillë në Kosovë. Në vendet tjera me sisteme juridike të avancuara, platforma të tilla ekzistojnë tashmë dhe janë shumë të zhvilluara, por në Kosovë, besa edhe në rajon, nuk ka diçka të tillë që është kaq e mençur dhe kaq e furnizuar me dokumente. Kështu që, kemi dashur me e zgjidhë një problem të vogël por të rëndësishëm në sistemin drejtësisë dhe sundimin e ligjit në Kosovë”, tregoi Krasniqi.
Sa i përket saktësisë së materialit që gjendet në këtë platformë, Krasniqi tha se ata procesojnë të dhëna vetëm nga burimet zyrtare.
“Pa dyshim, ne procesojmë të dhëna vetëm nga burime zyrtare, pra nga burimet që janë publike dhe sipas ligjeve të Kosovës janë dokumente të qasshme për gjithkënd. Ato dokumente pastaj ne i procesojmë me algoritmet tonë duke e fuqizuar po ashtu edhe me inteligjencën artificiale, duke i bërë të filtrueshme, të kërkueshme dhe duke e bërë platformën të mençur, ashtu që përdoruesi i fundit ta ketë me të lehtë navigimin në tërë spektrin ligjor të Kosovës”, shpjegoi Krasniqi.
Ai, për shikuesit e ATV-së bëri edhe një demonstrim se si të kenë qasje në këtë platformë dhe si t’i bëjnë kërkimet e materialeve që iu përdoruesve iu interesojnë. /atvlive.tv
