Javën e kaluar në transmetim të drejtpërdrejt në emisionin “Libero” në ATV ishte i ftuar figura kryesore e Grupit muzikor AURORA, Nazmi Sfishta – Nazi. Intervista me të u shpërnda gjithandej nëpër rrjete sociale dhe nxiti reagime të shumta.
Pikërisht për këtë intervistë që bëri bujë të madhe, moderatori i këtij emisioni Resul Sinani, pati një reagim. Ai tha se nuk duhet trajtuar pazakonshëm njerëzit e pazakontë, njerëzit që flasin dhe mendojnë ndryshe, pavarësisht problemeve në jetët e tyre personale, fesë, gjinisë,etj.
“LIBERO, nuk i trajton pazakonshëm njerëzit e pazakontë, njerëzit që flasin dhe mendojnë ndryshe, që shoqëria jonë e ka vështirë t’i pranojë dhe këtë fatkeqësisht po e dëshmon për vite me radhë. Njerëzit jo-konvencional, në secilën fushë, nuk na japin asnjë të drejtë, as mua e as të tjerëve, t’i trajtojmë ndryshe, t’i fyejmë e t’i ofendojmë, veç pse janë apo flasin gjëra që neve na duken, apo edhe nëse në të vërtetë janë krejtësisht të paqëndrueshme. Në raste të tjera, edhe po të kishim në emision njerëz që kanë çrregullime të natyrave të ndryshme, gjithashtu do t’i trajtonim njësoj sikurse gjithë të tjerët, sepse secili nga ta, është sikurse NE. Të barabartë pavarësisht problemeve në jetët e tyre personale, pavarësisht fesë, gjinisë, partive politike. Të barabartë, pavarësisht të gjithave!… Gjithashtu, është e rëndësishme që ta theksojmë, që në LIBERO ani pse mundohemi t’i përshtatemi edhe kohës moderne duke ekzistuar fuqishëm në shumësinë e mediave, nuk ka qenë dhe nuk do të jetë kurrë primare të ftojmë mysafirë dhe të trajtojmë tema që kanë qëllim vetëm përfitimin material, e aq më pak përfitimin material personal!..
Po e ndjej të nevojshme t’ua rikujtoj moton e emisionit tonë që “LIBERO frymon LIRI në qasjen dhe trajtimin e temave, përzgjedhjen e të ftuarve, shprehjen e ideve, qëndrimeve e bindjeve ndaj fenomeneve shoqërore. LIBERO fuqishëm respekton këtë moto që nga dita e parë e deri më sot, dhe do të vazhdojë ta bëj një gjë të tillë, derisa të ketë ekzistencë”, shtoi tutje Sinani./atvlive.tv/
