PËRGATITI: FITIM MAJKOVCI
Për katër ditë grevë, menaxhmenti i ndërmarrjes publike ‘’Trepça’’ ka ndëshkuar me nga 176 euro, 151 minatorët të cilët për katër ditë bojkotuan punën. Sipas ndërmarrjes, nëse bojkoti vazhdon, do të merren masa edhe më të rënda ndaj tyre. Masat e ndërmarra ndaj tyre, sindikata e minatorëve të ‘’Trepçës’’ i ka cilësuar si shantazh dhe kërcënim të menaxhmentit.
Rreth 176 euro për një punëtor, për katër ditë ‘’bojkot pune’’ është masa që ndërmarrja publike ‘’Trepça’’ e ka marrë ndaj 151 minatorëve që grevuan.
Punëtorët e kësaj ndërmarrjeje morën këtë masë si rezultat i vonesës së pagave, të cilën tani edhe ashtu do ta marrin të reduktuar.
“Një vlerë që mund të jetë e përafërt e humbjeve ditore në rast të mos punës varet nga shumë faktorë, mund të jetë nga 40 mijë deri në 50 mijë euro në ditë. Masa fillestare është marrë ndaj 151 punëtorëve të cilët kanë bojkotuar punën, dhe një kalkulim i përafërt i masës financiare që do të merret ndaj tyre do të jetë rreth 176 euro për një punëtor, për këto katër ditë të bojkotit të punës’’.
Abdurrahmani, shtoi se nëse bojkoti i punës thellohet, sanksionet ndaj minatorëve do të jenë me pagë deri në 40 për qind.
‘’Në konsultim me zyrën ligjore dhe departamentet tjera, kemi marrë masat e para që çdo bojkot dhe sabotim në punë do të sanksionohet me ndalesa të ekzekutimit të mëditjeve dhe shujtave ditore, dhe nëse ky bojkot dhe sabotim thellohet, atëherë i kemi masat e rregulloreve të brendshme të cilat sanksionojnë edhe me pagë deri në 40 për qind, mirëpo ligjet i kemi shumë të qarta që do të thotë se çdo bojkot dhe sabotim mbi tre ditë pune mund të shpie edhe deri në shkëputje të marrëdhënies së punës për çdo punëtor që e bënë këtë vepër…’’
Këto masa të menaxhmentetit ndaj punëtorëve, Ibrahim Jonuzi nga sindikata e minatorëve i ka cilësuar si shantazh dhe tentim për t’i heshtur ata në kërkesat e tyre.
‘’Për neve si sindikatë ky vendim i menaxhmentit është i pa pranueshëm dhe është kërcënim e shantazh ndaj fuqisë punëtore, ndaj minatorëve për t’i heshtur ata në kërkimin e realizimit të të drejtave të tyre. Realizimi i pagës është obligim i tyre dhe vonesat në paga janë dështim i menaxhmentit.’’
Veç çështjes së pagës minatorët e ndërmarrjes ‘’Trepça’’ kanë pakënaqësi edhe sa i përket kushteve në minierë si dhe punës pa sigurim shëndetësor.
