Emisioni veror i ATV-së, “n’mal An’det”, që nisi transmetimin javën e kaluar, vazhdon të sjellë për shikuesit argëtim, intervista dhe eksplorim kulturor.
Një ndër rubrikat e shumta të këtij emisioni është edhe rubrika “A më mirë këtu, a atje”, qëllimi i së cilës është që t’i bashkojë shqiptarët kudo që ndodhen.
Në emisionin e mbrëmshëm, ekipi i ATV-së bëri një vizitë te këngëtari dhe autori të njohur shqiptar, Nikollë Nikprelaj, në shtëpinë e tij në Tuz të Malit të Zi.
Ai, në bisedën e tij për ATV-në, foli për karrierën e tij shumëvjeçare, por nuk munguan edhe rrëfimet nga jeta personale.
I lumtur për vizitën e një mediumi nga Kosova, ai tregoi dashurinë e tij të madhe që ka për këtë vend, duke thënë se për të, por edhe për shqiptarët në Mal të Zi, Kosova është gjithçka.
“Kosova për mua, por edhe për ne është gjithçka, është shkolla, është baba, është nëna, është uji, është buka, është ajri, është kënga, është gjithçka. Për mua si këngëtar në veçanti, por edhe për gjithë neve, e kam thënë shpesh se “po të mos ishte Kosova, s’e di a do të flisnim sot shqip, sepse në Kosovë janë shkollu mësuesit tanë, profesorët tanë, sepse Shqipërinë në kohëra pak më të largëta e kishim hermetikisht të mbyllur, kështu që zgjedhja e jonë kombëtare, identitete ishte Kosova”, u shpreh Nikprelaj.
Këngëtari prezantoi edhe familjen e tij, gruan dhe dy djemtë, ku njëri ka zgjedhur të jetë këngëtar, ndërsa tjetri futbollist.
“Për fat të keq, nuk kalojmë bashkë aq sa do duhej e sa do donim, shkaku i punëve që kemi. Unë si këngëtar, Albini si këngëtar dhe si student, Arbeni si futbollist, Drita sa andej sa këndej, por aq kohë sa na krijohen mundësitë e shfrytëzojmë maksimalisht që të jemi bashkë. Jashtë punës jemi bashkë”, tregon Nikprelaj. /atvlive.tv
Bisedën e tij të plotë për ATV-në e gjeni në videon më poshtë:
Në videon e më poshtme e gjeni emisionin e plotë “n’mal A n’det” që u transmetua mbrëmë:
