Austria mund të jetë pa një prej lojtarëve kryesorë në përballjen e së dielës ndaj Kosovës.
Michael Gregoritsch, i cili në ndeshjen e fundit kishte bartur shiritin e kapitenit, është në dyshim për sfidën që zhvillohet nga ora 18:00 në Vjenë.
Sulmuesi 32-vjeçar u dëmtua në nyjën e këmbës gjatë fitores 3-1 të Austrisë ndaj Izraelit në Linz. Gregoritsch u detyrua të largohej nga fusha në pjesën e parë, ndërsa në vend të tij u aktivizua Sasha Kalajdzic.
Megjithatë, lajmi nga kampi austriak nuk është alarmues. Federata Austriake e Futbollit ka bërë të ditur për agjencinë APA se dëmtimi nuk është serioz. Gregoritsch iu nënshtrua edhe rezonancës magnetike të premten për të përcaktuar gjendjen e tij.
Pavarësisht kësaj, koha e shkurtër deri në ndeshjen me Kosovën e bën të pasigurt paraqitjen e tij.
Përzgjedhësi i Austrisë, Ralf Rangnick, ka lënë të kuptohet se nuk do të rrezikojë me sulmuesin nëse ai nuk është plotësisht i gatshëm.
“Ai e zuri keq nyjën dhe u përpoq ta lidhte, por kishte probleme dhe u desh të ndalej. Nuk duket të jetë lëndim serioz, por ndeshja ndaj Kosovës është shumë shpejt. Ndoshta do të jetë i gatshëm për dy ndeshjet e tjera”, deklaroi Rangnick.
Kështu, mbetet për t’u parë nëse Gregoritsch do të jetë në dispozicion për sfidën ndaj “Dardanëve”, apo do ta ndjekë ndeshjen nga bankina.
