Granit Xhaka ka shuar përfundimisht spekulimet rreth një largimi të mundshëm nga Sunderlandi, duke konfirmuar se nuk do të transferohet te Chelsea dhe se do të vazhdojë karrierën me klubin anglez.
Mesfushori shqiptar, i cili ishte lidhur vazhdimisht me një kalim në “Stamford Bridge”, ku thuhej se kërkohej me ngulm nga trajneri Xabi Alonso, ish-trajneri i tij te Bayer Leverkusen, e bëri të qartë se e ka marrë tashmë vendimin për të ardhmen.
Pas kualifikimit historik të Zvicrës në çerekfinale të Kupës së Botës 2026, Xhaka foli edhe për situatën e tij në nivel klubesh, duke theksuar se ndihet i lumtur te Sunderlandi dhe nuk e mendon një largim.
“Sunderlandi ka qenë shtëpia ime që nga dita e parë. Të gjithë jemi shumë të lumtur. Kam vendosur të qëndroj aty ku jam. Gjëja më e rëndësishme është familja. Jam gati të bëj histori me këtë klub”, deklaroi kapiteni i Zvicrës.
Deklarata e tij i jep fund thashethemeve të merkatos, ndërsa Sunderlandi ruan një nga lojtarët më të rëndësishëm të skuadrës. Klubi anglez e mbylli sezonin e kaluar në vendin e shtatë të Ligës Premier, rezultat që i siguroi pjesëmarrjen në Ligën e Evropës për edicionin e ri, ndaj drejtuesit nuk kishin ndërmend të hiqnin dorë nga lideri i mesfushës.
Nga ana tjetër, Chelsea mbeti jashtë garave evropiane dhe nuk arriti ta bindte 33-vjeçarin të ndryshonte ambient.
Xhaka komentoi edhe suksesin e Zvicrës në Botërorin 2026, pasi helvetikët eliminuan Kolumbinë pas penalltive dhe siguruan një vend në mesin e tetë kombëtareve më të mira të turneut.
“Ende nuk mund ta besoj plotësisht atë që po ndodh. Sot është një ditë e veçantë për të gjithë ne”, u shpreh ai.
Tashmë fokusi i kapitenit shqiptar është te sfida e radhës në Kupën e Botës, ku Zvicra do të ketë përballë kampionen në fuqi, Argjentinën, në një duel që pritet të jetë një nga më interesantët e fazës çerekfinale.
