Presidenti i Real Madridit, Florentino Perez, është gati të thyejë rekordin e transferimeve të klubit me një ofertë marramendëse për mesfushorin e Paris Saint-Germain, Joao Neves.
Pak ditë para zgjedhjeve presidenciale të klubit, Perez zbuloi se do të paraqesë një ofertë prej 150 milionë eurosh për një futbollist të nivelit të lartë, duke e cilësuar atë si investimin më të madh në historinë e klubit madrilen.
“Të martën do t’i dërgoj një ofertë një klubi të madh për një lojtar të nivelit të lartë. Do të ofroj 150 milionë euro, që do të jetë shuma më e lartë që Real Madridi ka paguar ndonjëherë. Nuk do ta merrni kurrë me mend se kush është”, deklaroi Perez, duke mohuar se bëhej fjalë për Michael Olise, Erling Haaland apo ndonjë futbollist nga Liga Premier.
Megjithatë, mediat spanjolle nuk vonuan të zbulojnë identitetin e objektivit kryesor të madrilenëve. Sipas gazetares së njohur Arancha Rodriguez, oferta rekord e Real Madridit do të jetë për yllin portugez të PSG-së, Joao Neves.
Mesfushori 21-vjeçar ka shkëlqyer që nga transferimi i tij në Paris në verën e vitit 2024 nga Benfica për 66 milionë euro. Ai është shndërruar në një nga lojtarët më të rëndësishëm të skuadrës franceze dhe konsiderohet si një nga talentet më premtues në futbollin evropian.
Deri më tani, Neves ka regjistruar 97 paraqitje me fanellën e PSG-së, duke kontribuar me 14 gola dhe 11 asistime në të gjitha garat.
Sipas raportimeve të mediumit spanjoll Cope, Perez është i gatshëm të shkojë edhe përtej shumës prej 150 milionë eurosh për ta bindur PSG-në të heqë dorë nga mesfushori portugez. Presidenti i Real Madridit thuhet se e sheh Nevesin si një figurë kyçe për të ardhmen e mesfushës së klubit dhe nuk ka ndërmend të heqë dorë nga transferimi i tij.
