Një nga talentët më premtues të futbollit kosovar, Erblin Osmani, i cili është pjesë e akademisë së Bayern Munichut, ka vizituar Federatën e Futbollit të Kosovës gjatë qëndrimit të tij në vendlindje.
Lajmin e ka bërë të ditur presidenti i FFK-së, Agim Ademi, i cili e priti futbollistin e ri në selinë e federatës, duke vlerësuar rrugëtimin dhe potencialin e tij në një nga klubet më të mëdha të futbollit evropian.
Gjatë vizitës në Kosovë, Osmani ka shfrytëzuar rastin për t’u njohur më nga afër me zhvillimet në futbollin kosovar. Ai ka ndjekur gjithashtu seancën stërvitore të Kombëtares së Kosovës në stadiumin “Fadil Vokrri”, ku ka parë nga afër punën e stafit teknik dhe atmosferën që mbretëron brenda grupit të Dardanëve.
Sipas Ademit, vizita e Osmanit dëshmon lidhjen e vazhdueshme që futbollistët e rinj me prejardhje nga Kosova ruajnë me vendin e tyre, pavarësisht se po zhvillojnë karrierën në klube prestigjioze evropiane.
Presidenti i FFK-së e cilësoi Osmanin si një nga përfaqësuesit e gjeneratës së re që po e promovon emrin e Kosovës në arenën ndërkombëtare, duke shprehur besimin se ai ka potencial për të arritur nivele edhe më të larta në futboll.
Vizita e tij në Kosovë vjen në një periudhë kur gjithnjë e më shumë talente të diasporës po mbajnë kontakte të afërta me futbollin kosovar, duke forcuar lidhjet me Kombëtaren dhe me vendin e origjinës.
