Hezbollahu dyshohet se ka ndërmarrë një seri sulmesh me raketa ndaj Izraelit gjatë natës. Mediat shtetërore iraniane raportuan se grupi i mbështetur nga Teherani ka lëshuar 15 raketa drejt veriut të Izraelit “në përgjigje të sulmeve izraelite”.
Forcat Mbrojtëse të Izraelit (IDF) nuk e kanë konfirmuar ende këtë shifër, por në kanalin e tyre në Telegram raportuan për disa sulme të tentuara gjatë natës.
IDF nuk ka njoftuar për të plagosur, por bëri të ditur se një goditje është identifikuar në zonën e Kiryat Shmona, në veri të Izraelit.
Ky zhvillim vjen pasi kryeministri izraelit, Benjamin Netanyahu, njoftoi se trupat izraelite kanë kaluar në veri të lumit Litani, që është kufiri i mëparshëm i zonës tampon, duke zgjeruar operacionet ushtarake kundër Hezbollahut.
Gjatë një vizite pranë kufirit verior të Izraelit, Netanyahu deklaroi: “Forcat tona kanë kaluar lumin Litani; ato kanë avancuar drejt pozicioneve strategjike. Ne po operojmë në Bejrut, në Luginën Bekaa, përgjatë gjithë vijës së frontit dhe po i shkaktojmë Hezbollahut një goditje shkatërruese.”
Nuk është ende e qartë se sa kontroll ushtron Izraeli në këto zona të reja dhe çfarë roli po luan qeveria libaneze në terren.
Lumi Litani konsiderohej më parë kufiri i zonës tampon që Izraeli synonte të krijonte në jug të Libanit. Gjithashtu, sipas Rezolutës 1701 të OKB-së, ai shërbente si vijë ndarëse e një zone të çmilitarizuar, e cila tani ndodhet nën kontrollin e forcave izraelite.
Sipas Ministrisë së Shëndetësisë së Libanit, më shumë se një milion persona janë zhvendosur nga shtëpitë e tyre në jug të vendit, ndërsa mbi 3 mijë persona janë vrarë nga sulmet izraelite.
Izraeli ka deklaruar se paralajmëron civilët përpara sulmeve dhe se objektivi i operacioneve është vetëm Hezbollahu, grupi i armatosur i mbështetur nga Irani.
Korrespondentja speciale e Sky News, Alex Crawford, tha se ushtria izraelite ka lëshuar tashmë urdhra të detyrueshëm evakuimi për rreth 15% të territorit të Libanit.
Ndërkohë, Irani ka bërë të qartë se çdo marrëveshje për t’i dhënë fund përballjes së tij me SHBA-të duhet të përfshijë edhe ndërprerjen e luftimeve mes Izraelit dhe Hezbollahut.
Luftimet mes Izraelit dhe Hezbollahut në Liban duhej të ishin pezulluar në kuadër të një zgjatjeje të armëpushimit, pas përplasjes së fundit që nisi në fillim të muajit mars.
