Nga 16 prilli 2026, publiku do të ketë mundësinë të ndjekë në kinema filmin e gjatë artistik “KARMA”, me skenar dhe regji nga Esat Fejza.
Filmi sjell një histori që ndërthur dramën, humorin e zi dhe reflektimin social, duke prekur një temë universale dhe gjithmonë aktuale: raportin mes zgjedhjeve tona dhe pasojave që ato lënë pas.
Në qendër të rrëfimit janë tre miq që ribashkohen pas vitesh dhe, të shtyrë nga rrethanat dhe dëshira për ta ndryshuar fatin e tyre, përfshihen në një plan sa absurd, aq edhe të rrezikshëm. Ajo që nis si një përpjekje për t’i shpëtuar realitetit, shndërrohet shpejt në një vorbull ngjarjesh të papritura, ku humori, tensioni dhe drama ndërthuren pandërprerë. Në këtë përballje, secili prej tyre detyrohet të përballet me të kaluarën, me veten dhe me peshën e vendimeve që nuk mund të zhbëhen.
“KARMA” nuk vjen vetëm si një histori me kthesa dramatike, por edhe si një reflektim i thellë mbi fatin, ndërgjegjen dhe përgjegjësinë morale. Përmes një gjuhe filmike të drejtpërdrejtë dhe emocionale, filmi ngre një pyetje thelbësore për secilin shikues: a mund t’i shpëtojë njeriu vërtet pasojave të veprimeve të veta?
Filmi është realizuar nga Prolog Film, në bashkëprodhim me G-On Film Production, dhe është mbështetur nga Qendra Kinematografike e Kosovës. Edona Keçmezi është producentja e filmit, ndërsa Agron Krasniqi mban rolin e bashkëproducentit. Kolona zanore është kompozuar nga Arber Krasniqi, duke i dhënë filmit një dimension të veçantë emocional dhe atmosferik.
Me një qasje autoriale të dallueshme dhe me një ndërtim që lëviz mes absurdit, dramës dhe ironisë së jetës, “KARMA” synon të sjellë një përvojë të veçantë kinematografike. Filmi pritet të tërheqë vëmendje jo vetëm për temën që trajton, por edhe për atmosferën, ritmin narrativ dhe personazhet e tij, të cilët vijnë të afërt, të brishtë dhe thellësisht njerëzorë.
“KARMA” nis shfaqjen nga 16 prilli 2026 në Cineplexx Prishtinë dhe Cineplexx Prizren, duke e ftuar publikun të përjetojë një histori ku asgjë nuk ndodh rastësisht dhe ku çdo veprim lë gjurmën e vet.
