PËRGATITI: KASTRIOT TAHIRI
Komuna ka nisur renovimin e Qendrës së Mjekësisë Familjare, në fshatin Hajvali të Prishtinës. Banorët thonë se për shërbime nga mjekët po udhëzohen të shkojnë në qendrën e re që është rreth 5 kilometra larg fshatit.
Në letrën e vendosur në derën e Qendrës së mjekësisë familjare në fshatin Hajvali, data e nisjes së rinovimeve shënon, që nga 20 qershori, por sipas banorëve këtu, ata nuk po marrin shërbime këtu tash e 10 ditë.
Për shërbime mjekësore thonë se janë të detyruar të shkojnë në qendrën kryesore të mjekësisë familjare, por shkuarja deri atje po del të jetë e mundimshme.
Në Prishtinë që dy ditë jam tu shkua te spitali, nuk është e përshtatshme hiç, se ja kallaballëk, ja qashtu, se punët që duhet me u krye ma herët nuk po kryhen, se po arsyetohen ja projekti, ja sene.
Ndonëse po udhëzohen, që për shërbime të shkojnë në qendrën e re e cila u përuruar të mërkurën në Veternik, banorët thonë se po kanë vështirësi për ta gjetur vendin.
Shumë nxehtë tash me shkua deri në qytet me marrë shërbime, këta po thonë diku te gjykata me shkua, po nuk po e di ku është.
Komuna tha se punimet për rinovimin e qendrës së mjekësisë familjare në këtë fshat, pritet të përfundojnë më së largu deri më 26 qershor.
