Lionel Messi ka përfunduar blerjen e klubit spanjoll Eldense, duke bërë një tjetër hap të rëndësishëm në botën e futbollit edhe jashtë fushës.
Klubi, që garon në divizionin e dytë të futbollit spanjoll, e ka konfirmuar zyrtarisht marrëveshjen përmes një njoftimi të publikuar më 1 tetor.
Blerja e Eldenses e bën Messin pronar të dy klubeve në futbollin spanjoll. Më herët, ylli argjentinas kishte marrë kontrollin e UE Cornellà, klub katalanas që garon në nivelet më të ulëta të futbollit spanjoll.
Eldense është klub nga qyteti i Elda, në provincën e Alicante-s, dhe është themeluar në vitin 1921. Skuadra zhvillon ndeshjet në shtëpi në stadiumin Nuevo Pepico Amat, me kapacitet rreth 5,800 tifozë.
Klubi u rikthye në nivelin e dytë të futbollit spanjoll në sezonin 2023/24, pas rreth gjashtë dekadash mungesë.
Pas shtatë javëve të para të kampionatit, Eldense ka regjistruar një fitore, dy barazime dhe katër humbje, duke u renditur në pjesën e poshtme të tabelës.
Tashmë, me hyrjen e Messit në pronësi, klubi pritet të nisë një kapitull të ri, me fokus te zhvillimi dhe rritja e projektit.
-
Blerja e Eldenses lidhet me interesin e Messit për të zgjeruar aktivitetin e tij në biznesin e futbollit. Argjentinasi, i cili aktualisht luan për Inter Miami, po ndërton gjithnjë e më shumë një rol edhe jashtë fushës.
Shuma e saktë e transaksionit nuk është bërë publike. Në muajt e fundit është raportuar për një ofertë prej rreth 12 milionë eurosh nga biznesmeni argjentinas Ricardo Pini, por nuk ka konfirmim se kjo është shuma e paguar nga Messi.
Pronari i mëparshëm i Eldenses ishte grupi ndërkombëtar i investimeve i biznesmenit kolumbian Juan Carlos Trujillo, i cili e kishte marrë drejtimin e klubit në tetor 2025.
Tashmë, Messi nis një tjetër aventurë në futbollin spanjoll, këtë herë si pronar i një klubi me histori mbi një shekull dhe me ambicie për t’u zhvilluar në vitet e ardhshme.
