Alaia Baldwin, motra e modeles së njohur Hailey Bieber, rrezikon dënim me burg pasi u arrestua në muajin shkurt 2024 në Savannah, Georgia, për një incident të dhunshëm në një bar lokal.
33-vjeçarja akuzohet se ka sulmuar tre punonjës të lokalit, duke shkaktuar kaos brenda ambienteve të tij. Sipas raportimeve të Us Weekly, Baldwin u përfshi në një përplasje fizike pasi iu kërkua të mos përdorte tualetin e stafit, por atë të klientëve.Prokuroria e Xhorxhias ka ngritur katër akuza kundër saj për kundërvajtje: sulm i thjeshtë, dhunë e thjeshtë dhe dy akuza për shkelje prone. Nëse shpallet fajtore, Alaia Baldwin mund të përballet me deri në një vit burg, ndërsa seanca e dënimit është planifikuar për 23 prill.
Sipas dëshmive të punonjësve, situata u përshkallëzua kur Baldwin refuzoi të largohej nga tualeti i stafit dhe u bë agresive, duke kërcënuar dhe më pas sulmuar fizikisht stafin. Një roje sigurie pretendon se ajo i ka tërhequr flokët.
Ngjarja ka ngjallur reagime të shumta në rrjet, ndërsa pritet vendimi i drejtësisë në muajt në vijim.
