Bes Kallaku duket se po përjeton një fazë të re dhe të lumtur në jetën e tij personale, të cilën këtë herë ka vendosur ta ndajë pa rezerva me publikun. Aktori i njohur i humorit, shpeshherë në qendër të vëmendjes për jetën private, ka dhënë së fundmi një sinjal të qartë se zemra e tij nuk është më vetëm.
Përmes një InstaStory që u komentua gjerësisht, Besi publikoi një imazh simbolik ku shfaqen dy duar të kapura fort, një detaj i thjeshtë, por me mesazh të fuqishëm emocional. Vëmendjen e ndjekësve e tërhoqi menjëherë tatuazhi në parakrahun e tij, ku është gdhendur emri “Ejona”, së bashku me datën “25.12.2025”, e cila duket se shënon një moment të rëndësishëm për çiftin.
Atmosfera romantike u plotësua edhe nga kënga në sfond “I’ll Love You Forever”, ndërsa nën tatuazh, aktori kishte shtuar frazën poetike “Trëndafil në kohë lufte”, një dedikim që sugjeron se kjo lidhje ka lindur mes sfidash dhe ndryshimesh të mëdha personale.
Sipas burimeve të “Prive by Liberta Spahiu”, kjo romancë nuk ka nisur së fundmi. Bes Kallaku dhe partnerja e tij janë në një lidhje të qëndrueshme prej disa muajsh, por kanë zgjedhur ta mbajnë larg syrit të publikut deri në këtë moment.
Me këtë postim, Besi duket se jo vetëm konfirmon lidhjen, por edhe tregon se është gati ta jetojë këtë dashuri pa fshehje.
