Përgatiti: Leon Bixhaku
Filmi kosovar “HANA” po korr sukses ndërkombëtar, duke tërhequr vëmendjen e audiencave dhe kritikëve në festivale të ndryshme botërore. Pas një procesi të gjatë xhirimesh dhe sfidash, filmi është zgjedhur për premierën botërore në Goa, Indi, ku do të prezantohet Kosova në skenën ndërkombëtare.
Sheqerie Buqaj aktorja kryesore e filmit “HANA”, në emisionin “LIBERO” ka dhënë detaje rreth premierës, tematikës dhe vështirësive gjatë xhirimeve.
“…Filmi zgjati shumë, që nga 2017. Skenari… pastaj rastisi që unë të kisha problem shëndetësore, më pas pandemia dhe menduam se gjithçka do të dështonte, edhe pse filmi mori përkrahje nga Maqedonia…”, tha Buqaj.
Aktorja u shpreh e zhgënjyer teksa foli për pamundësinë e saj për të qenë pjesë e prezantimit të filmit në Indi:
“…Më 23 Nëntor, në Goa të Indisë, do të mbahet premiera botërore ku filmi do ta prezantojë Kosovën si shtet. Por, për shkak se India nuk e njeh Kosovën si shtet, nuk kam mundësi të jem pjesë e premierës së filmit…”, u shpreh ajo.
Buqaj e përshkroi projektin si një përvojë të jashtëzakonshme dhe emocionalisht të ngarkuar.
“…Ka pasur momente që nuk ishte më vetëm aktrim. Unë hyra 100 për qind në rol. Kisha vite që e dija skenarin dhe isha përgatitur për këtë personazh…”, deklaroi aktorja.
Vlen ta theksojmë se filmi “HANA” trajton jetën e një gruaje të dhunuar seksualisht gjatë luftës, e cila përmes aktrimit bëhet zëri i shumë grave me përvoja të ngjashme. Pas një kohe, ajo gjen forcën për të rrëfyer edhe dhimbjen e saj personale nëpërmjet rolit që luan.
Për ta dëgjuar intervistën e plotë të Sheqerie Buqajt në LIBERO, klikoni në linkun e mëposhtëm:
