PËRGATITI: PRANVERA KRASNIQI
Banorët e qytetit të Klinës kërkojnë pastrimin e lumenjve, të cilët u përmbytën gjatë janarit të këtij viti. Për shkak të ujërave të zeza, lumenjtë e këtij qyteti, sipas banorëve, nuk mund të përdoren as për peshkim. Komuna thotë se e ka gati projektin për ta zgjidhur këtë problem.
Ndotja e lumenjve nga ujërat e zeza në qytetin e Klinës, është kthyer në një problematikë për banorët, si dhe për peshkatarët që e frekuentojnë këtë pjesë.
Viktor Gjergjaj çdo ditë ecën mbi 3 km për të peshkuar në lumenjtë e Klinës.
Por, peshqit që kap, thotë se nuk janë të shëndetshëm për t’i ngrënë, për shkak të ndotjes që u shkaktua nga përmbytjet e janarit.
“Lumenjtë janë shumë të ndotur. Këto derdhje të kanalizimeve në lumë ndikojnë te peshqit se ne e vërejmë tash kur e kapim peshkun, i vjen erë e keqe, edhe natyrisht që nuk është i shëndetshëm si ushqim… Sa ma i pastër të jetë lumi, aq më i shëndetshëm do të jetë peshku.”
Banorët ankohen se tash e 5 muaj nuk kanë as ujë të pijshëm, pasi ujërat e zeza, sipas tyre, derdhen në burimet prej të cilave furnizohen me ujë.
“Na furnizohemi prej këtij uji, por era që i vjen tash mundet me na pru sëmundje të ndryshme, nëse përdoret për pirje”.
“Shumë i papastër. Këtu jon mledhë krejt ujërat e këqija, edhe s’bon me pi këtë ujë”.
Drejtori i Shërbimeve Publike në Klinë, Qëndrim Millaku, ka një përgjigje për shqetësimet e bashkëvendësve.
“Gjatë këtyre dy viteve të ardhshme, do të përfundojnë impiantet për trajtimin e ujërave të zeza, në të gjithë lumenjtë e qytetit të Klinës, pasi që kemi pasë çrregullime nga periudha e janarit, por do të marrim masa që një gjë e tillë të mos përsëritet.”
Përmbytjet që ndodhën në fillim të vitit kanë prekur lumenjtë Klina, Bistrica e Deçanit, Lumbardhin e Pejës, si dhe Drinin e Bardhë për rregullimin e të cilëve dhe filtrimin e ujërave të zeza komuna ka ndarë 650 mijë euro.
