“House of Guinness” do të publikohet më 25 shtator në Netflix, duke sjellë një serial dramatik që zbërthen historinë e një prej familjeve më të njohura në Irlandë – atë të themeluesit të birrës legjendare Guinness, Arthur Guinness.
Seriali është fryt i idesë së Ivana Lowell, pasardhëse e familjes, e cila vendosi të hedhë në dritë rivalitetet, intrigat dhe tragjeditë që kanë shoqëruar brezat e Guinnessëve. Inspirimi i saj lindi gjatë një takimi familjar në Kildare, kur, duke parë një episod të “Downton Abbey”, ajo kuptoi se historia e familjes së saj ishte edhe më e pasur dhe më e vërtetë. Pas kthimit në Long Island, Lowell hartoi një propozim prej 20 faqesh, ku dramatizoi ngritjet dhe rëniet e dinastisë Guinness, nga Arthur deri tek pasardhësit e tij, duke përfshirë edhe faktin që sot konsumohen mbi 10 milionë gota birrë Guinness çdo ditë në botë.
Seriali, i krijuar nga Steven Knight – autori i “Peaky Blinders” – fokusohet kryesisht tek raporti i tensionuar mes vëllezërve Edward dhe Arthur, të cilët përballen me ndarjen e pronësisë së birrarisë pas vdekjes së të atit. Përveç tyre, edhe personazhe si Anne dhe Benjamin luftojnë me presionet familjare dhe realitetin e ashpër të Irlandës së shekullit XIX.
Për Ivana Lowell, e cila nuk ka formim profesional si shkrimtare, por është rritur mes rrëfimeve dhe dramave të familjes, ky projekt është realizimi i një ëndrre. Ajo thotë se “House of Guinness” mbart një energji të gjallë e të freskët, ashtu si vetë birra Guinness, që vazhdon të jetë e dashur edhe për gjeneratat e reja.
