Lideri i AAK-së, Ramush Haradinaj, ka përkujtuar sot njërën nga ditët më të dhimbshme dhe heroike të historisë së Kosovës, 3 prillin e vitit 1999, kur forcat kriminale serbe kryen masakrën e Kralanit dhe në vijën e frontit ranë luftëtarë të Ushtrisë Çlirimtare të Kosovës.
Në këtë masakër, në Kralan të Gjakovës, u vranë mizorisht 86 civilë shqiptarë – burra, gra dhe fëmijë, ndërsa edhe pas 25 vitesh, përgjegjësit e këtij krimi nuk janë vënë para drejtësisë.
Po atë ditë, në betejë për liri, ra heroikisht Arton Mehmetaj, i treti dëshmor nga familja e lavdishme Mehmetaj e Gllogjanit. Përkrah tij, deri në frymën e fundit, luftuan dhe ranë edhe Halit Coka nga Kukësi, Mustafë Çekaj, Visar Myftari, Fehmi Shala, Kujtim Qallakaj, Ilir Hoxha dhe shumë të tjerë që me jetën e tyre shkruan historinë e lirisë.
“Liria nuk na erdhi vetë, ajo u fitua me gjak e sakrificë ndër breza. Sot dhe përherë mbetet detyra jonë ta mbrojmë këtë liri dhe ta çojmë përpara Kosovën, ashtu siç ëndërruan ata që dhanë jetën për të,” ka deklaruar Haradinaj.
