Federata e Futbollit e Kosovës ka konfirmuar se Albian Hajdari nuk do të jetë i gatshëm për ndeshjen e sotme ndaj Austrisë.
Mbrojtësi pësoi lëndim në sfidën e fundit të Kosovës kundër Irlandës dhe, pavarësisht përpjekjeve të stafit mjekësor dhe punës intensive gjatë ditëve të fundit, nuk ka arritur të rikuperohet në kohë për përballjen në Vjenë.
Sipas njoftimit të FFK-së, edhe vetë Hajdari ka shprehur dëshirë të madhe për të qenë në dispozicion dhe për ta ndihmuar ekipin në këtë duel të rëndësishëm. Megjithatë, ekzaminimet e fundit mjekësore kanë konfirmuar se ai nuk mund të aktivizohet.
Hajdari do të vazhdojë të qëndrojë nën përkujdesjen e stafit mjekësor të Kombëtares së Kosovës, me synim rikuperimin e plotë nga lëndimi.
Mungesa e tij pritet të sjellë ndryshim në formacionin defensiv të “Dardanëve”. Ron Raçi shihet si kandidati kryesor për ta zëvendësuar Hajdarin në qendër të mbrojtjes, ku pritet të luajë përkrah Lumbardh Dellovës dhe Ilir Krasniqit.
Kosova përballet me Austrinë sot në Vjenë, në një sfidë me rëndësi të veçantë për vazhdimin e garës në grup.
