Kalo te përmbajtja
Të fundit

Virgil Van Dijk hap derën e largimit nga Liverpooli: “Nëse nuk rinovoj, do të përshëndetem në verë”

Nga Gazetar i verifikuar i ATV

Shto ATV në Google(hapet në dritare të re)

Ndaj

Ndani këtë artikull përmes

Ose kopjo linkun

Virgil Van Dijk hap derën e largimit nga Liverpooli: “Nëse nuk rinovoj, do të përshëndetem në verë”

Kapiteni i Liverpoolit, Virgil van Dijk, ka lënë të hapur mundësinë e largimit nga “Anfield” në verën e vitit 2027, kur i përfundon kontrata me klubin anglez.

Qendërmbrojtësi holandez, i cili ka qenë një nga figurat kryesore të suksesit të Liverpoolit në vitet e fundit, ka pranuar se ende nuk e ka marrë një vendim për të ardhmen e tij, duke theksuar se gjithçka do të varet nga ajo që do të ndodhë gjatë muajve të ardhshëm.

Reklamë

Në një intervistë për “Sky Sports”, Van Dijk është shprehur optimist për vazhdimin e karrierës, duke besuar se ka ende shumë vite për të luajtur në nivelet më të larta.

“Gjëja më e rëndësishme për mua është të ndihem mirë dhe të kujdesem për veten. Mendoj se kam ende shumë vite përpara në fushë. Çfarëdo që të ndodhë pas këtij sezoni, do ta shohim. Për momentin, askush nuk e di se çfarë do të bëj sezonin e ardhshëm, madje as unë vetë”, deklaroi holandezi.

Më tej, kapiteni i “The Reds” theksoi se për momentin është i përqendruar vetëm te ndeshjet e radhës dhe objektivat e skuadrës, duke mos dashur të mendojë shumë larg në të ardhmen.

Van Dijk, i cili ka fituar dy tituj të Premier League dhe një Ligë të Kampionëve me Liverpoolin, ka kujtuar edhe rrugëtimin e tij në “Anfield”, duke e cilësuar atë si një periudhë të jashtëzakonshme të jetës së tij.

“Ka qenë një udhëtim i mrekullueshëm. Deri në verë do të kem kaluar pothuajse 10 vjet këtu. Liverpooli ka qenë një pjesë shumë e rëndësishme e jetës sime dhe do të jem gjithmonë mirënjohës për gjithçka që ka ndodhur gjatë këtyre viteve”, u shpreh ai.

I pyetur për mundësinë e rinovimit të kontratës, mbrojtësi ishte i qartë se ende nuk ka asgjë të vendosur.

“Nëse kontrata rinovohet, do ta shohim. Nëse jo, do t’u them lamtumirë të gjithëve në verë”, tha Van Dijk.

Holandezi pranoi gjithashtu se një largim nga Liverpooli do të ishte emocionalisht i vështirë, jo vetëm për të, por edhe për familjen e tij, duke pasur parasysh lidhjen e krijuar me klubin dhe tifozët gjatë këtyre viteve.

Megjithatë, 35-vjeçari theksoi se nuk dëshiron të ndryshojë qasjen e tij dhe do të vazhdojë të përqendrohet te ajo që mund të kontrollojë, duke lënë të ardhmen të vendoset në kohën e duhur.

Reklamë