Mjekët ushtarakë britanikë janë hedhur me parashutë në ishullin e largët atlantik Tristan da Cunha për të ndihmuar një shtetas britanik i dyshuar me hantavirus.
Burri ishte larguar nga MV Hondius — anija turistike e goditur nga një shpërthim vdekjeprurës i virusit — në mesin e prillit, në territorin më të largët të banuar britanik jashtë shtetit, ku ai jeton.
Ai raportoi simptomat e para dy javë pasi kishte zbritur nga anija dhe thuhet se ndodhet në gjendje stabile ndërsa qëndron i izoluar. Tashmë janë konfirmuar gjashtë raste me virusin, përfshirë edhe dy britanikë të tjerë që po trajtohen jashtë anijes.
Të shtunën, nga një avion RAF A400M u hodh edhe oksigjen, pasi rezervat në ishull kishin arritur në një nivel “kritik”, tha Ministria e Mbrojtjes (MoD).
Gati një muaj pas vdekjes së parë në bordin e MV Hondius, anija tashmë ka mbërritur në Tenerife, ku autoritetet po ndihmojnë më shumë se 100 persona të zbresin për t’u riatdhesuar.
Tre persona kanë vdekur nga shpërthimi, përfshirë dy që u konfirmua se kishin hantavirus.
Hantavirusi është një grup virusesh që bartet nga brejtësit. Shumica e hantaviruseve nuk transmetohen nga personi te personi, por varianti Andes — i identifikuar te disa persona që kishin qenë në anijen holandeze — transmetohet.
Britaniku që jeton në Tristan da Cunha kishte zbritur nga anija më 14 prill, sipas Organizatës Botërore të Shëndetësisë (OBSH).
