Tre yje të futbollit saudit drejt rikthimit në Evropë, gjigantët evropianë i kanë në radar

Futbolli evropian mund të mirëpresë sërish disa emra të njohur që aktualisht aktivizohen në Arabinë Saudite. Afati kalimtar i janarit 2027 pritet të sjellë zhvillime interesante për të ardhmen e Joao Felix, Ivan Toney dhe Darwin Nunez, të cilët mund të largohen nga kampionati saudit.

Secili prej tyre ka një situatë të ndryshme, por një gjë i bashkon: mundësia për t’u rikthyer në futbollin e nivelit më të lartë në Evropë.

Emri që po përmendet më së shumti është ai i Joao Felixit. Sulmuesi portugez, që aktualisht luan te Al-Nassr, nuk e ka fshehur dëshirën për t’u rikthyer në Evropë dhe për të garuar sërish në Ligën e Kampionëve.

Forma e tij këtë sezon ka qenë mbresëlënëse, me shtatë gola dhe 11 asistime në 14 paraqitje. Madje, në mesin e mundësive të përfolura është edhe një rikthim te Barcelona, ku kishte luajtur më parë si i huazuar. Megjithatë, kontrata e tij me Al-Nassr dhe mundësia e vazhdimit të saj mund ta vështirësojnë largimin.

Në anën tjetër, vëmendjen e klubeve angleze e ka tërhequr Ivan Toney. Sulmuesi i Al-Ahlit është lidhur me Manchester Unitedin dhe Newcastle Unitedin, ndërsa përvoja e tij në Ligën Premier me Brentfordin e bën një përforcim potencialisht shumë interesant.

Megjithatë, një transferim i tij do të varet edhe nga kërkesat financiare të klubit saudit.

Ndërkohë, rasti i Darwin Nunez është më ndryshe. Uruguaiani, pas një periudhe jo të qëndrueshme te Al-Hilal, është huazuar te Al-Diriyah deri në vitin 2027. Për momentin, prioriteti i tij është rikthimi në formën më të mirë dhe sigurimi i minutave të rregullta në fushë.

Përvojat e mëparshme te Benfica dhe Liverpooli tregojnë se Nunez ka cilësitë për të luajtur në nivelet më të larta të futbollit evropian.

Tashmë, janari mund të jetë vendimtar për të ardhmen e këtyre tre sulmuesve. Felix dhe Toney duken më pranë një largimi të mundshëm, ndërsa për Nunez gjithçka do të varet nga paraqitjet në muajt e ardhshëm.

Një gjë është e sigurt, rikthimi i tyre në Evropë do të ishte një nga temat më interesante të merkatos së dimrit.