Përgatiti: Armand Hoti
Deputetët e pushtetit brenda Komisionit për Ekonomi kanë votuar në tërësi projektligjin dhe amendamentet e propozuara për Fondin Sovran. Kështu shënohet hapi i radhës legjislativ drejt realizimit të premtimit të kamotshëm elektoral të partisë në pushtet.
“Po ashtu, procedura legjislative ka përfunduar, gjithë përgatitja institucionale dhe e financimit është paraparë në Ligjin për Ndarjet Buxhetore për vitin 2024, dhe ne presim që nga viti/ky vit, pra me miratimin e Ligjit, të fillojë edhe jetësimi i Fondit Sovran”, tha deputeti i LV-së, Armend Muja.
Ndërmarrjet si: Korporata Energjetike, Telekomi, Posta, Trepça, Trainkosi dhe Infrakosi pritet t’i kalojnë në pronësi të Fondit Sovran.
Eksperti i ekonomisë, Safet Gërxhaliu, thotë se funksionalizimi potencial i Fondit në praktikë do marrë shumë kohë.
“Mund të votohet, mund të kalojë në Kuvend, por zbatimi eventual i tij, jo që kërkon kohë, por për mua do të jetë një mision i pamundur”, tha Gërxhaliu.
Vërejtje logjike dhe juridike karshi konceptit për Fondin Sovran shprehu edhe kryetari i komisionit për ekonomi.
“Ne jemi në fazën e transformimit të këtyre aseteve do të vijnë nga një shoqëri centraliste ekonomike dhe kanë një koncept krejt tjetër këto struktura, qoftë menaxhuese qoftë të aseteve. Konsideroj që tanimë kemi një konglomerat të ideve jo të qartësuara mirë dhe do të jenë në dëm të ekonomisë së vendit në periudhën katër apo pesëvjeçare…ka potencial të madh të shkoj në kushtetuese sepse prek resurset minerare dhe mjedisore të vendit”, tha deputeti i PDK-së, Ferat Shala.
Projektligji për Fondin Sovran, me votën e deputetëve të pushtetit në korrik të këtij viti, u votua në Kuvend në lexim të parë.
Sipas projektligjit, kapitali themeltar i Fondit do të jetë 20 milionë euro. Ndërsa, me themelimin e tij do të shuhet Agjencia Kosovare e Privatizimit.
