Shkolla fillore dhe e mesme e ulët “Pavarësia” në Prishtinë ka njoftuar për një ndryshim të përkohshëm në çmimin e sigurimit të nxënësve për muajt maj dhe qershor. Sipas njoftimit zyrtar, çmimi i sigurimit do të jetë 2 euro për këta dy muaj, ndërkohë që në periudhën tjetër të vitit shkollor do të jetë vetëm 1 euro. Kjo është një rritje e përkohshme që lidhet me rrethana specifike të fundvitit shkollor.
Drejtori i shkollës, Halil Brahaj, ka deklaruar se vendimi është marrë në bashkëpunim me këshillin e prindërve, pas kërkesave të shumta nga ana e tyre. Ai ka theksuar se gjatë muajve maj dhe qershor nxënësit marrin pjesë në më shumë aktivitete jashtë klasës, përfshirë ekskursione, vizita mësimore dhe aktivitete sportive, që rrisin nevojën për mbulim më të lartë sigurimi.
Sipas drejtorit Brahaj, qëllimi kryesor i këtij vendimi është që të sigurohet mbrojtje më e mirë për nxënësit në raste të ndonjë incidenti gjatë këtyre aktiviteteve. Ai ka shtuar se shkolla nuk përfiton financiarisht nga ky ndryshim, pasi shuma e mbledhur do të përdoret ekskluzivisht për sigurimin dhe shërbimet përkatëse që lidhen me të.
Prindërit kanë shprehur mbështetje për këtë iniciativë, duke e parë si një masë shtesë të kujdesit për fëmijët e tyre. Shumica prej tyre kanë theksuar se, përkundër rritjes së përkohshme të kostos, ata ndihen më të sigurt duke e ditur se fëmijët e tyre janë të mbikqyrur dhe të sigurtë, gjatë periudhave me më shumë lëvizje dhe aktivitete.
Rrjeti i Prindërve të Kosovës përmes një përgjigje me shkrim kanë potencuar se janë dakord për këtë vendim.
Ndryshe, Ky vendim pasqyron një qasje të kujdesshme dhe bashkëpunuese midis shkollës dhe prindërve, duke vënë në plan të parë sigurinë dhe mirëqenien e nxënësve. Në të njëjtën kohë, vendimi paraqet gatishmërinë e institucionit arsimor për të dëgjuar dhe për t’iu përgjigjur kërkesave të komunitetit shkollor.
