Përgatiti: Fatlum Jashari
Së paku deri në verë, në Mitrovicë të Veriut, Zveçan, Leposaviq dhe Zubin-Potok nuk pritet të nisë faturimi i energjisë elektrike bazuar në matjen e konsumit.
Deri në realizimin e projektit të financuar nga Bashkimi Evropian për vendosjen e matësve inteligjentë, konsumatorëve do t’u kërkohet pagesë paushall.
“Për të mbështetur zbatimin e marrëveshjes së Dialogut Prishtinë – Beograd për udhërrëfyesin e energjisë dhe marrëveshjen komerciale ndërmjet operatorit të shpërndarjes së Kosovës – KEDS dhe furnizuesit – Elektrosever, më 16 shkurt, BE-ja publikoi tenderin për furnizim me njehsorë të mençur të energjisë elektrike për komunat veriore të Kosovës. Tenderi përfshin furnizim me katër lloje të pajisjeve matëse, një koncentrator të dhënash dhe transformatorë të rrymës/tensionit. Afati i fundit për pranimin e ofertave është 15 Prill 2024”, thuhet në njoftimin e BE-së.
Punët në terren për vendosjen e matësve apo njehsorëve nuk pritet të nisin para majit ose qershorit.
Në draft-kontratën të cilën e ka parë ATV-ja, afati për realizimin e punëve të parapara në tender është 365 ditë, që nënkupton se finalizimi i procesit të faturimit bazuar në sasinë e konsumit mund të vonohet edhe më shumë.
Në total, në katër komunat me shumicë serbe në veri, parashihet të vendosen rreth 25 mijë matës të mençur, por vlera e kontratës nuk është përcaktuar ende.
Matësit e konsumit do t’i dorëzohen KEDS-it dhe në pajtim marrëveshjen me Elektroseverin, do të vijohet me vendosjen e tyre.
Megjithëse, nga 1 Janari ka nisur nominimin e energjisë për katër komunat në veri, Elekstrosever ende nuk u ka dërguar konsumatorëve fatura, duke i njoftuar ata se përkohësisht do të paguajnë paushall ndërmjet 25 dhe 30 euro në muaj.
Që nga përfundimi i luftës, dëmi buxhetor si pasojë e mos-pagesës së energjisë elektrike në këtë pjesë të vendit llogaritet të jetë rreth 350 milionë euro.
