Përgatiti: Sara Shehu
Mbi 1 milion e 500 mijë euro, Komuna e Prishtinës ka investuar këtë vit në renovimet infrastrukturore të Qendrave të Mjekësisë Familjare të Kujdesit Parësor, ndërkohë që në total për këto shpenzime kishte në dispozicion 2 milion euro e gjysmë.
Teksa QMF-të në Breg të Diellit, në Hajvali, Bardhosh, Bërnicë e Epërme, Mati 1 janë rinovuar, punimet në disa qendra të tjera ende po vazhdojnë.
Nënkryetari i komunës, Alban Zogaj, tha se deri në fund të vitit do të investojnë në shumicën e qendrave.
“Sa i përket investimeve në kujdesin parësor shëndetësor drejtoria e shëndetësisë e ne së bashku si komunë qëndrojmë mirë, kemi investuar do të investojmë deri në kryerjen e punimeve….”, tha nënkryetari i Komunës së Prishtinës, Alban Zogaj.
Edhe Ministri i Shëndetësisë, Arben Vitia theksoi se e shohin të nevojshme rritjen e investimeve në nivelin parësor.
“Ne do të rrisim kapacitetet tona për të rregulluar kujdesin parësor shëndetësor, për vite me radhë kane qenë të nevojshme që të bëhen rregullime të tilla, ne do të rregullojmë çdo qendër të mjekësisë nëpër të gjitha komunat e kosovës pa dallim”, tha Vitia.
Sidoqoftë, Komuna e Prishtinës tash e sa vite në listën e investimeve kapitale gjithnjë e vendos edhe ndërtimin e Spitalit të Prishtinës. Mirëpo, edhe sivjet nuk është bërë asgjë për këtë projekt, për të cilin janë buxhetuar më shumë se një milion Euro. Ndërkohë gjysmë milion Euro kanë qenë të buxhetuara edhe për digjitalizimin e shërbimeve shëndetësore dhe në Prishtinë, mirëpo, as ky projekt nuk është zbatuar as sivjet.
Më shumë detaje i gjeni në Edicionin Qendror të lajmeve në videon më poshtë:
