Irani ka lëshuar edhe raketa lundruese, pos dronëve, në drejtim të Izraelit, kanë raportuar mediat në Izrael.
Ushtria e Izraelit ka thënë se Irani ka lëshuar disa dronë drejt Izraelit të shtunën në mbrëmje.
Më herët, zëdhënësi i Forcave të Mbrojtjes të Izraelit, kundëradmirali Daniel Hagari e konfirmoi zyrtarisht fillimin e sulmit ndaj Izraelit.
“Pak kohë më parë, Irani nisi mjete ajror pa pilot nga territori i tij drejt territorit të shtetit të Izraelit”, thuhet në deklaratën e tij.
Kryeministri Benjamin Netanyahu deklaroi se Izraeli është gati për një sulm të drejtpërdrejtë nga Irani dhe do të përgjigjet në të njëjtën mënyrë.
“Qytetarët e Izraelit, në vitet e fundit, dhe aq më tepër në javët e fundit, Izraeli është përgatitur për mundësinë e një sulmi të drejtpërdrejtë nga Irani. Sistemet tona të mbrojtjes janë të vendosura dhe ne jemi të përgatitur për çdo skenar, si në mbrojtje ashtu edhe në sulm”.
“Shteti i Izraelit është i fortë, IDF është i fortë, publiku është i fortë. Ne e vlerësojmë SHBA-në për qëndrimin në krah të Izraelit, si dhe mbështetjen e Britanisë së Madhe, Francës dhe shumë vendeve të tjera”, u shpreh Netanyahu.