Përgatiti: Fatlum Jashari
Heqja eventuale e masave ndëshkuese të Bashkimit Evropian ndaj Kosovës mund të jetë në rend dite, së shpejti.
Shefi i politikës së jashtme të unionit 27-anëtarësh, Josep Borrell, është në fazën përmbyllëse të hartimit të dokumentit, i cili do të shërbejë si bazë për vendim-marrje.
“Unë mund vetëm të konfirmoj, pa diskutuar për procesin që po vijon në Këshill, që raporti është gati të finalizohet dhe përfundimisht t’u dërgohet shteteve anëtare. Por, nuk do të komentonim për afatet kohore dhe përmbajtjen, për shkak se janë procedura të brendshme”, tha zëdhënësi për Punë të Jashtme dhe Siguri i BE-së, Peter Stano.
Përkundër që ishin vendosur pa votim, përfshirja në konkluzat e Këshillit të BE-së, më vonë, e bën të domosdoshëm pajtimin e plotë nga shtetet anëtare për heqjen masave.
“Procedura në thelb është përcaktuar në konkluzat e Këshillit për Çështje të Përgjithshme, më 12 Dhjetor, ku qartësohet se Këshilli do të diskutojë heqjen eventuale të masave ose shtimin e tyre, varësisht zhvillimeve në terren, bazuar në një raport të Përfaqësuesit të Lartë për nivelin e përmbushjes së kërkesave të BE-së drejtuar Kosovës, paraprakisht, kur masat ishin vendosur”, tha Stano.
Me mbajtjen e votimit për shkarkimin e kryetarëve në katër komunat me shumicë serbe në veri më 21 Prill, i cili u bojkotua nga Lista Serbe, Qeveria konsideron se Kosova ka përmbushur të gjitha kërkesat e BE-së për heqjen e masave.
